Diasabra ultimo Fundacion MiMami a organisa su di 6 edicion di Christmas Toy Drive na Cas di Cultura. Cu e iniciativa aki, mucha- y hobennan cu tin cos di hunga na cas cu no ta usa mas y cu por wordo regala, por trece esaki y asina Fundacion MiMami por duna esaki back na comunidad na muchanan cu no por haya regalo di pasco.
Fundacion MiMami a cuminsa como un grupo di Facebook specialmente y unicamente pa mamanan cu ta busca apoyo di un of otro forma. Ariba e grupo di apoyo aki e maminan ta haci pregunta, ta busca ayudo material, moral of emocional of simplemente ta comparti anecdotanan di bida.
E Christmas Toy Drive ta un evento hopi special y tin como meta pa educa e muchanan den comunidad pa sa e nificacion di gratitud, balor y amor pa nan prohimo.
“Na e forma aki nos kier extende na prome luga un palabra di danki na tur nos muchanan cu a haci e evento aki un exito total. Momentonan excepcional y unico pa experencia ora cada mucha ta deposita nan coy hunga pa asina haci un otro mucha feliz e pasco aki. Danki na cada mami cu a tuma nan tempo pa sortia y conscientisa nos muchanan e importancia di comparti,” e fundacion a comparti ariba nan pagina di grupo ariba Facebook.
Despues di e toy drive aki, e fundacion ta den preparacion pa paketa tur e cosnan di hunga cu a wordo colecta, pa asina un cantidad di mucha por disfruta di un regalito e pasco aki.
