Fundacion pa Hende Muhe den Dificultad recientemente a ricibi e Comision Permanente di Parlamento pa Asuntonan Social y di Famia cu kier a haya un orientacion riba kico tur e fundacion aki ta encera demostrando asina e importancia y responsabilidad social pa esunnan den dificultad.
Fundacion pa Hende Muhe den Dificultad e luna aki ta cumpli 25 aña haciendo trabounan grandi pa yuda hende muhenan y hende homber den dificultad di violencia domestico.
Danki na fondonan di Hulanda, pronto por expande proyectonan pendiente cu ta encera 6 unit nobo den e prome fase. Despues tin pensa di agrega 10 mas pa e bira 16 en total. Durante e bishita aki Sra. Magaly Maduro, Coordinador di e fundacion, a elabora riba tur e trabounan di FHMD y e proyectonan a corto plaso y contesta preguntanan mas detaya encuanto di e estadisticonan di e fundacion.
Ademas a splica e comision di e otro trabounan di informacion y conscientisacion cu fundacion ta haci door di diferente charlanan cu ta tene na entre otro scol pa Polis, na scolnan y na pia di trabou.
A elabora ampliamente ariba e importancia di registracion di casonan pa por midi esaki den full e problematica di Violencia Domestico. Despues di a intercambia cu otro e miembronan di Parlamento a ricibi un recorido rond di e fundacion na unda nan por a mira e tereno riba cual e expansion di e Shelter ta bay tuma luga. Fundacion pa Hende Muhe den Dificultad ta contento di a ricibi fondonan for di Hulanda pa por amplia e capacidad pa por atende mas cliente cu aworaki.
Riba e potret por mira Coordinador di Fundacion pa Hende Muhe den Dificultad cu e miembronan di Staten di Aruba.
