Girl daughter playing blocks toy over father and mother, happy family concept

Importancia di hungamento pa e desaroyo di nos muchanan ta hopi importante, ta p’esey cu Fundacion pa Nos Muchanan hunto cu Fundacion Hunga Teca ta organisa un tayer pa asina informa mayornan un tiki mas tocante esaki y e beneficionan cu esey ta trece pa nan yiu.

Asina a splica pa Bon Dia Aruba Yamila Hoevertsz ken ta presidente di Hunga Teca na unda cu el a trece dilanti cu diasabra awor 18 di september, e dos fundacion aki a uni nan forsa pa duna mas apoyo y ayudo na mayornan den proceso di desaroyo di nan yiunan cu tin un edad entre 0 pa 12 aña.

E tayer aki lo tuma luga diasabra awor 18 di september na Parke Neptali Henriquez for di 9or di mainta te cu 12or di merdia na unda cu 20 mayor so lo haya e oportunidad pa cu e dos organisacion aki mustra nan cua parti di e mucha su desaroyo mester stimula.

Hunga Teca ta un fundacion ubica na YMCA San Nicolas na unda cu diasabra ta habri for di 9or di mainta te cu 11or pa mayornan hunga cu nan yiu den un luga hopi leuk.

Pero pa e tayer aki, Fundacion Pa Nos Muchanan a organisa conhuntamente cu Hunga Teca y e idea ta cu e mayornan lo haya un splicacion riba cua aspecto e mucha ta desaroya segun su edad. Hoevertsz a duna por ehemplo, un baby di 0 pa 1 aña ta desaroya su parti fisico, su celebro, su parti social-emocional y e ta desaroya su idioma, e ora ey den tayer nan lo splica e mayornan cu pa e baby por desaroya su aspecto fisico mayornan mester sa kico mester sa pa hunga cune.

Di otro banda, pa desaroya e parti social-emocional mester dun’e musica, hunga boot y esey ta loke nan lo enfoca diasabra awor nan unda cu nan lo parti tur e etapanan for di baby te mucha di 2 aña, di 4 pa 6 aña y muchanan di scol basico di 6 pa 12 aña cu cuater aspecto den desaroyo, caminda cu un mucha di 4 aña por ehemplo, pa desaroya su idioma mester lesa buki y conta historia pero nan ta bay laga e mayornan tambe haci’e.

“Nan no ta bay sinta y scucha so, nan ta bay haci tambe e weganan pa nan sinti kico ta nifica, pasobra un mucha ta importante pa desaroya e parti social-emocional door di usa su fantasia, e ora ey nos ta bay hunga cu e mayor”, el a expresa.

E lo bay ta hopi interactivo segun Hoevertsz a menciona caminda cu mayornan ta bay haya papelnan tambe cu tur aspecto riba dje cu ta duna un splicacion, pero mayornan tambe ta bay lanta y experiencia kico esaki kiermen, “pasobra hunga cu un mucha no ta solamente importante pa e mucha, sino pa mayor tambe pa motibo di e confiansa cu e yiu ta haya cu su mayor”, el a bisa.

E aliansa entre Fundacion Hunga Teca cu Fundacion Pa Nos Muchanan a cuminsa dia cu Fundacion Pa Nos Muchanan a cumpli 30 aña y nan a invita algun organisacion enfoca riba area di muchanan y Hunga Teca tambe tabata t’ey segun Hoevertsz a declara.

For di eynan a bin nace e idea di haci trabou hunto na unda cu e prome tayer tabata den dianan di vakantie di scol cu a pasa dirigi na tur lider di traimerdia, nan a haci algo similar cu informacion y splicacion manera un les pero laga nan traha coy di hunga y nan tabata hopi entusiasma segun el a sigura.

Den e tayer cu lidernan di traimerdia, Hoevertsz a señala cu nan a bisa cu awor nan ta compronde dicon un mucha tin biaha e ta fada, di mesun manera nan hunto a organisa un otro tayer pa mamanan hoben soltero algun dianan pasa.

Pa esaki, manera a indica caba ta dirigi pa 20 mayor so pa via di espacio y cu nan tin cu implementa protocol sanitario pa Covid-19 y ademas e cuponan ta limita.

Pa mayornan cu por ta interesa y pa haya mas informacion por tuma contacto na e telefon 583.4247/588.0856.

LEAVE A REPLY

Please enter your comment!
Please enter your name here