Fundacion Parkietenbos ta keda kere den dialogo cu gobierno pa cu dump

IMG_7198.JPG
Stichting Parkietenbos cu ta representa habitantenan cerca e dump a indica cu nan ta sigui kere den e dialogo cu gobierno pa yega na un solucion di e dump di Parkietenbos. 
 
E grupo a presenta nan mes na prensa diahuebs cu presidente Edith Koolman. E ta indica cu pa varios luna nan ta den dialogo directo cu gobierno. Pasobra segun e: “dump a crece bia un monster y un bista mahos sin ningun clase di siguridad ni medida ni inspeccion riba dje ni rond di dje.”
 
“Nos tur sa cu tur dia tin candela sea cu e ta wordo cendi of ta cende di su mes pero e punto ta cu e candela t’ey cu ta saca huma cu tur dia ta keda contamina nos aire como tambe pulmonnan di nos muchanan y habitantenan cu ta biba den e bario.” Sra. Koolman ta informa cu Stichting Parkietenbos den nomber di tur e habitantenan di e bario nan concerni ta bisa cu nan no ta acepta esaki mas. Segun Sra. Koolman ‘dump ta un bom cu un ora pa otro por causa un of otro desaster. E aña aki e habitantenan di e barionan menciona a sufri mas cu nunca pa motibo di clima instabil y cambio di direccion di biento kimamento di waya di koper, kimamento di tire, holo malo, bestia morto, cuminda putri y tambe candela cu segun habitantenan di e bario ta bisa cu ta cende su so. 
 
E ta conta cu habitantenan mester cera cas y tin cu te hasta mester bandona cas pa cierto oranan of dia muchanan no por hunga pafo y no por colga aña na cabuya, no por haci cas limpi drechi. Anochi hendenan ta sofoca den nan soño y tin varios caso di muchanan cu a haya asma, segun e presidente.
 
Aunke no tin prueba te awor cu dump ta e causa.  Esaki ta algo cu un otro grupo di habitante kier logra, cu no ta afilia na e fundacion. Pues no ta e caso cu tur habitantenan ta representa den e Stichting Parkietenbos. Tin un grupo cu a manda carta pa gobierno unda ta pone nan responsabel pa cualkier daño na salud, cas etc. Nan ta den spera pa un contesta di gobierno ainda. Den e caso cu nada ta resulta, nan a indica cu lo bay corte pa asina forsa gobierno y Serlimar pa tuma medida pa baha e molester. Pa nan no ta cuestion di cera dump, pero primordialmente pa kita e molester di huma, holo y tambe bestia manera musca. 
 
Manera ya a sali den Bon Dia Aruba, gobierno a haci un promesa na Stichting Parkietenbos cu comienso otro aña lo cera e dump. Sinembargo esaki no ta mustra algo realistico como cu tin diferente fase cu mester tuma luga. Asina awor gobierno ta trahando riba un acuerdo cu Ecotech pa tuma over e proceso di sushi di cas: enbes di bay dump pa Ecotech separa e sushi y manda esaki afo. Algo cu no por conta riba sosten di e personal di Serlimar, sinembargo. 
 
Pa cu e habitante diahuebs, secretario di e fundacion Milton Ponson ta informa cu berdad e habitantenan ta cana un caminda di cruz. Y no pa 2, 3 aña pero sigur 50 aña. 
 
Sr. Ponson ta sigui bisa cu e mes personal tin 48 aña biba den e bario di Parkietenbos y  mira cu so propio wowonan kico dump ta nifica pa su bario: “di un cos chikito cu ningun hende tabata tin molester di dje awe a bira un monster cu no ta aceptabel mas.” “Si nos compara aña nan 50 cu porta un 50mil hende tabata tin biba riba e isla aki en comparacion cu awendia cu tin mas cu 120mil hende y nos conta e hotelnan acerca cu ta produci hopi sushi, nos por imagina nos mes ta con e sero aki a para crece den e ultimo decenianan.”
 
Por ehempel si un di nos tuma e tempo ora nos ta cana rond den tur e supermercadonan aki na Aruba tira un bista riba tur e articulonan cu tin den e tralienan, tur loke tin eyden na papel, plastic, saco di carton , bleki , boter. Tur e cosnan ey ta ariba dump nan ta bin para. Tambe tur e materialnan kimico, dañino pa salud y gasnan cu ta wordo forma eyriba cu ta perhudica salud di e habitantenan di e bario tambe mester tene cuenta cu ne.” Sr. Milton  ta bisa cu ta basta y ta haya cu mester trece un stop.
 
Fundacion Parkietenbos
Sr. Ponson ta informa cu e fundacion aki a wordo lanta na aña 2002 pa poco hendenan di bario cu a dicidi di forma un stichting pa yega na solucion. Sr. Ponson ta bisa cu e stichting aki a cana un caminda di cruz y no tabata tin oido di nos gobernantenan. Politiconan nunca a percura pa busca solucion pa problema di dump, lagando un periodo cu nan a purba haci algo riba dump cu te dia di awe pa un motibo of otro no a funciona, segun e. 
 
Na november 2010 despues cu a tene ariba iniciativa di Sra. Koolman dos biaha un reunion di bario y a confronta e ministernan cu e problema aki, nan a wordo priminti cu lo haci algo pa trece solucion pa e problemanan aki. Tambe Sr. Ponson ta bisa cu tabata hopi dificil pa haya oido di e ministernan ora cu pidi reunion ta tarda por lo menos 2 pa 3 luna prome cu logra haya reunion. Pa ora cu finalmente nan a logra haya cita nan keda bou di e impresion cu e ministernan no ta duna mucho atencion na e seriedad di e caso. 
 
Na principio di e aña aki e directiva actual a reforsa nan mes cu cierto hende y a dicidi cu ta tuma e caminda di dialogo pa motibo cu nan no tabata kier pa e cos ki bira un wega  politico. Sr. Ponson ta bisa cu nan ta di opinion cu si nan para duro dialoga cu gobierno,  nan mester por logra algo. Aunke cu den e bario tin poco hende cu no ta di acuerdo cu e manera cu nan ta procede. 
Segun Sr. Ponson esaki tabata tin su resultadonan aunke poco poco cos no tabata bayendo con nan kier. Pues na augustus e aña ki nan a entrega un manifiesto na nos gobernantenan caminda ta bisa bon cla cu dump no ta aceptabel mas ni pa e bario y ni pa Aruba. Despues di a entrega e manifiesto a dicidi cu lo warda wak ki accion gobierno.
 
 
Pa 30 di november nan a logra haya un reunion cu  minister presidente Mike Eman y minister de Meza y algun di nan conseheronan expertonan ariba e tereno aki presente.  E ministernan participa na Stichting Parkietenbos cu nan ta trahando duro y cu ta wak cu pa januari lo por cuminsa cu cierto solucion manera e solucion cu Ecotech pa sushi di cas. Sr. Ponson ta indica cu pa nan esaki ta manera solo ta briya atrobe pero ta keda vigilante si. Pasobra nan ta keda preocupa cu gobierno por hala atras pa medio di presionnan cu gobierno por ta hayando di otro banda.

You May Also Like

Awe ta sali ultimo carga pa St. Maarten di Cruz Cora

Cruz Cora ta manda su ultimo carga cu productonan di ayudo pa St. Maarten ...

Parlamento a aproba privatisacion di Landslaboratorium

Minister di Salud Publico a presenta 2 ley di salud na Parlamento. Durante e ...

23mei dowers castigo pedofiel (NP).jpeg

Maneho nobo di husticia lo ta preventivo bou sistema ‘veiligheidshuis’

  Minister Arthur Dowers a declara na Bon Dia Aruba cu e weso di ...

Gerencia di Elmar y STA ta evaluando firma di protocol y documento riba reorganisacion

Despues  cu gerencia di e compania di utilidad Elmar N.V. a haci e presentacion ...

image.jpeg

Aruba den gara di atraco, atraco arma ariba cas na Sero Patrishi

Diadomingo marduga den careda di 3’or unidad nan di polis ariba caya y tambe ...

7Jul, JO, Abuso1.JPG

Abuso di mucha na Aruba no ta un secreto

Segun cabesante di St. Aloysius School, Sr. Vladimir de Cuba,  mester pone atencion riba e ...