Sindicato di aduana protestando contra proceso organisacion  

Ayera miembronan di Sindicato di Aduana Aruba (SADA) a dicidi di bay cerca Minister di Finansa encarga cu departamento di aduana pa entrega un carta unda ta mustra nan disgusto y inkietud pa cu e proceso di e organisacion di e departamento di aduana. 

 

E  duaneronan a reuni dilanti sede di gabinete di Gobernador y nan a bay den direccion di Bestuurskantoor pa manifesta.  Dirigentenan di SADA tabatin un reunion extraordinario cu minister Bermudez mes diamars ultimo, riba asunto di organisacion. 

 

Dirigentenan di SADA a indica cu a base di un  decision unanime  nan a traha y  entrega un carta cerca minister  Angel Bermudez, caminda nan a presenta e puntonan cu e duaneronan  ta considera cu a bira un “sumpiña den nan wowonan”.  Nan ta wardando riba un contesta di e mandatario pa evalua kico lo bira siguiente paso.

 

Reaccion di minister encarga 

E mandatario a ricibi e carta caminda e ta laga sa cu semper e ta haci su esfuerso pa scucha e miembronan di SADA. El a priminti di contesta e carta otro siman, caminda e lo reuni cu directiva di SADA.  E ta bisa cu berdad tin hopi cambio den e proceso di organisacion di duaneronan. Tambe e minister ta menciona cu a wordo traha un rapport riba e proceso aki cu a wordo actualisa, ya cu tabatin parti aden cu basicamente e no aplicabel mas.

 

E ta priminti SADA cu a base di e rapport aki unabes cu aña 2017 habri  nan ta bay cuminsa ehecut’e  y activa un comision manera ta wordo conseha. “Mi ta consciente cu boso nan cierto momento kier weita cambio. Hopi cambio caba ta pasando den e parti unda boso nan ta eherce boso  trabou di container na waf di Barcadera.” Tambe seccion di aduana na aeropuerto ta renobando, y esey ta crea cierto inkietud cerca e personal di aduana.