Fundacion Pro Cultura Arubano y Fundacion Bernadina ta den pleno preparacion pa eleccion di Reina di Folklore 2022, como tambe e Parada Cultural 2022, en conexion cu celebracion di Dia di Brazil 2022 organisa pa Fundacion Chico Harms.

Sra. Lilian Besselink, presidente di Fundacion Pro Cultura Arubano a comparti durante un rueda di prensa con Fundacion Pro Cultura Arubano ta preparando pa eleccion di Reina di Folklore y e Parada Cultural 2022.

Besselink a remarca cu e aña aki ta prome biaha cu Fundacion Pro Cultura Arubano ta bay ta mandando dos participante pa eleccion di Reina Folklore Cultural Aruba, den e categoria Baby Folklore Cultural y Gran Dama Folklore Cultural.

Baby Folklore Cultural, cu ta bay representa Fundacion Pro Cultura Arubano, ta den persona di Lisjenni Flanegin di apenas seis aña di edad, mientras cu Gran Dama Folklore Cultura ta Sra. Antonia Hilaria di 49 aña di edad. E eleccion di Reina Folklore Cultural di Aruba, categoria mucha y hoben, ta bay tuma luga dia 20 di augustus y categoria hende grandi ta bay tuma luga dia 27 di augustus. Ambos eleccion ta bay ta den Centro di Bario Brazil.

Pa loke ta trata e Parada Cultural 2022, esaki ta bay tuma luga ariba dia 4 di september, Dia di Brazil y segun Besselink ta splica e aña aki Fundacion Pro Culutra Arubano ta bay ta rindiendo homenahe na Trio Las Campiranas. Nan ta bay tin grupo di baile tambe, cu ta bay baila den show y despues nan ta bay tin e grupo di hende grandi caminda cu ta bay celebra e fiesta cultural.

Besselink a informa pa persona interesa pa participa den e Parada Cultural 2022 cu Fundacion Pro Culutra Arubano por inscribi ainda pa e grupo di hende grandi. Pa e grupo di mucha, 4 pa 11 aña di edad, tur cupo ta yen caba, aunke e fundacion ta deliberando si por tuma algun mucha, mas pa motibo cu si tuma mas mucha ta bay tin mester di mas leidster pa por cuida e muchanan.

Durante e Parada Cultural 2022, Fundacion Pro Cultura Arubano ta bay wordo compaña pa e banda musical Los Amicales. “Nos ta bon organisa, nos ta bon prepara, nos ta spera un y tur pa yuda haci cultura grandi. Uni un di e gruponan, tin mas grupo cu por inscribi den dje, contribui cu nos pa haci e parada aki un parada grandi unda cu nos ta sinti nos mes orguyoso”, Besselink a enfatisa.

Sr. Percy Jeandor, di Fundacion Bernadina, remarca cu e festival aki ta un obra masha bunita dedica na cultura di Aruba. “Nos di Fundacion Bernadina y Fundacion Pro Cultura Arubano ta trahando duro pa sigui mantene e festival aki, e parada aki bibo”, el a expresa.

Jeandor a subraya tambe cu loke ta hopi importante ta cu nan kier atrae mas hende, mas Arubiano pa sostene cultura di Aruba. El a haci yamado na persona cu tin conocemento of cosnan di temponan di antes cu por bin cune pa dilanti, semper ta bon bini pa tuma contacto cu cualkier di e fundacionnan cu ta dedica na mantene e cultura Arubiano bibo.

El a resalta cu cultura di Aruba merece “un dede ariba”, pero cu falta hopi ainda. “Nos ta prefera di wak otro cosnan di otro paisnan y di Aruba nos ta zink e. Sorry cu mi tin cu bisa e cos ki, pero ta berdad”, el a bisa.

LEAVE A REPLY

Please enter your comment!
Please enter your name here