Fundacion Rancho mester di mas boluntario pa realisa nan proyectonan 2017

Un grupo di trahadonan boluntario di Stichting Rancho a ricibi un certificado di aprecio pa e trabou cu nan ta realisando na fabor di e comunidad y bario di Rancho.

“Esaki sigur ta un aprecio tambe pa e trabou boluntario cu nan a haci”, presidente di Stichting Rancho, Clifford Rosa ta bisa Bon Dia Aruba.

Sr. Rosa a laga sa cu nan a probecha e anochi di apertura oficial di nan centro di actividad situa na Koningstraat 38, pa entrega e certificadonan na e boluntarionan, cu nan a conta cu nan, pa realisa diferente proyecto den e ultimo lunanan aki. Nan ta proyectonan pa ehempel di Adopta Un Hanchi na Rancho; y tambe e proyecto di Dia di Bisiña caminda nan a brinda un valioso trabou pa condiciona nan centro di actividad pa nan apertura.

Boluntarionan

El a bisa cu berdaderamente e fundacion ta conta cu un grupo di boluntario masha limita, pero e tin speransa cu e grupo aki lo por crece. “Actualmente nos no tin e cantidad cu nos ta desea. Pero nos ta spera mas persona cu nan lo por pone disponibel como boluntario, pasobra hopi proyecto tin.”

Sr. Rosa a laga sa cu hopi di nan proyecto no ta conta cu boluntario suficiente. P’esey nan ta motiva tur hende cu lo desea contribui cu e fundacion y cu e bario di Rancho pa acerca nan.

Presidente di Stichting Rancho ta hopi contento cu e adkisicion di nan centro di actividad cu lo bira e punto central pa nan fundacion por opera debidamente. Tambe pa ehecuta nan proyecto den general y specialmente e proyectonan cu lo bay yuda nan pa genera un tiki di fondo.