Fundacion Telefon pa Hubentud a informa mediante un conferencia di prensa tocante actividadnan cu nan ta organisando den cuadro di Dia Internacional di Derechonan di Mucha, cu ta dia 20 di november.

Pa esaki, James Sneek, director di e fundacion a splica cu na momento cu un mucha ta siña tocante derechonan, e ta siña cu e tin derecho y otro personanan tambe tin derecho, cu tur di nan mester respeta esaki y tambe ta siña cu na momento cu un hende tin un mal intencion cune, con e por para pa su mes.

Fundacion Telefon pa Hubentud ta bay cumpli 23 aña dia 20 di november. Riba e fecha aki pa prome biaha un mucha na Aruba a tuma e telefon y a marca e number 131 y a haya e ayudo y sosten for di Telefon pa Hubentud.

“Aworaki nos ta dunando e servicio no solamente na Aruba sino cu tambe nos ta dunando servicio na mucha y hoben di isla di Sint Eustatius y tambe na esun di Saba”, Sneek a sigura.

Esaki ta nifica cu e aña aki ta un aña grandi pa nan, cu lo ta celebrando e Dia Internacional di Derechonan di Mucha cu e organisacion di diferente actividad tocante derechonan di mucha dirigi pa mucha, hoben, tambe pa e mayornan y famia completo.

Dia 14 di november lo tuma luga e prome actividad na The Movies Gloria, unda International School of Aruba completo lo ta bay ta den un di e salanan y hunto cu nan ta bay mira diferente pelicula corto. Despues ta bay elabora riba e mensahenan di derecho di mucha, cu nan ta mira cu ta bin back den e peliculanan aki y tambe nan ta bay haci un debate.

“Asina aki nos ta bay duna informacion na e actor cu ta hoben den nos comunidad tocante e derechonan di mucha, derechonan cu nan mester sa tambe di respeta otro hobennan y con nan por para pa nan mes na momento cu un persona por tin un mal intencion pa cu un di nan derechonan”, Sneek a señala.

Di mesun manera, Shurman Milliard, trahado social di Telefon pa Hubentud a trece dilanti cu e ta mirando hopi interes pa loke ta e derechonan di mucha. “Derechonan di mucha ta algo cu Telefon pa Hubentud pa 23 aña akinan na Aruba – riba e momento aki hasta internacional – nos ta cumpli. Nos kier pa mas mucha sa di esaki y e prome personanan cu por siña esaki ta diferente fundacionnan, pero tambe mayornan y adulto en general” el a bisa.

Milliard a comenta cu manera ta haci otro fiesta por ehemplo, Halloween y Carnaval, e derechonan di mucha tambe mester wordo celebra mescos cu tur e otro fiestanan den un aña. P’esey Telefon pa Hubentud ta tuma esaki pa asina hende por sa cu nan si ta bay haci un fiesta grandi y pa e motibo ey a organisa varios actividad.

Pa 16 di november ta bay tin actividad na scol Hilario Angela, cu tambe ta haci diferente desaroyo di e tema aki y Telefon pa Hubentud kier yuda nan den e parti ey. E dia nan ta bay haci schedule pa tur e muchanan di scol y tambe pa e grupo di maestro

Den esaki, el a anuncia cu ta bay duna informacion na e muchanan tocante derechonan di mucha pa asina nan sa tambe kico nan ta celebrando. Ta existi 54 diferente derecho di mucha manera Milliard a informa y muchanan ta bay conoce esaki mas.

Banda di esey, nan ta papiando cu muchanan di sol primario unda ta bay duna diferente oportunidad dependiendo di nan nivel pa nan sa kico nan derechonan ta. Cu e muchanan mas chikito nan a haya e ayudo di Fundacion Hunga Teca, un fundacion dedica na muchanan cu ta enfoca riba hungamento y con muchanan ta desaroya diferente herment den nan sistema mental y motorico mientras nan ta hunga.

Nan ta bay uni esey na e derechonan di mucha unda muchanan di klas 1 y 2 ta bay haya lesnan di Hunga Teca riba e momento ey, igualmente cu e hobennan di International School Aruba nan ta bay haci esey cu klas 4,5 y 6 cu diferente cinenan nan ta bay analisa e derechonan di mucha.

Despues di esey, IBiSA ta bay yuda nan den e parti di movecion pa motibo cu nan sa con mucha por hunga y desaroya den deporte cu tambe ta un di e derechonan di mucha pa asina nan por desaroya e parti fisico y mental.

Pa culmina e dia, nan lo tin un musical cu un grupo internacional cu a bay hopi leu den duna informacion riba un manera leuk pa e muchanan, ademas di esey, den dianan aki nan kier pa comunidad henter conoce e derechonan di mucha.

Pa e motibo aki, Kimberly de Cuba trahado social di Telefon pa Hubentud a señala cu dia 18 di november nan lo comparti informacion pa e mayornan via e programa di television “Nos mainta” a traves di Telearuba.

Pa seis aña consecutivo, e programa di television aki den aliansa cu Fundacion pa Hubentud ta para keto durante e programa di e dia aki riba derechonan di muchanan.

Nan lo trece dilanti diferente fundacion como por ehemplo Heart-Centered Leadership Foundation, Futura y Simia unda lo comparti hunto cu Fundacion pa Telefon pa Hubentud e importancia di opinion di mucha pero tambe e salud di e mucha.

Banda di ayudo via telefonico y via e-mail cu e fundacion aki ta duna na e muchanan y hobennan durante aña, nan ta presenta diferente proyecto como por ehemplo ta Chic Chat unda nan a acerca Centro di Desaroyo di Hende Muhe pa forma parti di e proyecto aki.

Esaki ta encera diferente episodionan caminda por wak combersacionnan entre hobennan femenino entre 14 pa 17 aña caminda nan ta conta retonan cu nan ta encontra nan mes den edad aki.

Durante e programa nan tin profesionalnan como di Famia Planea y FADA unda nan por contesta preguntanan y dudanan cu e hobennan tabatin, tambe nan a ricibi diferente confesionnan di hobennan rond di Aruba den forma anonimo.

E programa aki a cuminsa dia 1 di november ultimo y ta bay wordo transmiti e proximo 8,10,15, 17, 22 y 29 di november y na december dia 6 y 13 di december.