Sub-caso “Damira” di caso penal Avestruz a tuma luga ayera den Corte

Ayera mainta for di 8.30 te cu 12or di merdia a wordo trata na Corte un di e sub-casonan di e caso penal Avestruz yama “Damira” unda a bin dilanti debate entre esunnan cu a pidi tereno y despues cu nan a hay’e nan a haci negoshi cu esey.

Pa cu esaki, David Kock abogado di Benny Sevinger a señala cu ayera mainta no a bin dilanti nada pa loke ta trata su cliente, “pasobra den esaki e no tin ningun sorto di envolvimento, di loke hendenan ta haci, cu nan compania a haya un derecho di erfpacht for di scope di un minister y minister no por supervisa, dificil pa bo culpa un minister, cu si bo ta haya iregularidadnan cu e hendenan aki lo a haci ta algo cu ta bay totalmente fuera di alcance of responsabilidad di un minister”, Kock a bisa.

Tambe, el a informa cu nan a pidi un testigo mas cu ta un persona di edad pero su salud no ta mucho bon y despues a dicidi cu esey no ta necesario mas, “di tur investigacionnan cu a haci a keda un pregunta mas di un desaroyo cu nos kier a trece y mañan (awe) lo tin un decision chikito si hues ta acepta e persona aki of no, e no ta un tragedia si e lo wordo rechasa pasobra tin un rapport traha tambe, e ta un formalidad cu nos mester pasa door di dje”, el a comenta.

Na final di luna di october ultimo corte a reserva 3 dia pa trata e caso di por lo menos seis sospechoso, reparti den dos pa tres sub-caso. E sub-casonan aki ta wordo yama Elenath y Deshaun unda a wordo trata e transaccionnan di terenonan reparti den varios luga rond di e isla y ademas con a wordo usa medionan ilegal pa cierto personanan por a adkiri un di e terenonan

Den luna aki ta bay trata e sub-casonan Damira y Bucuti cu otro sospechosonan ademas di Benny Sevinger cu otro asunto pa loke ta trata labamento di placa y malversacion di fondonan.

Ayera mainta Kock tambe a comenta cu aunke e hues ta un persona critico y skerpi, Kock ta compronde cu hues kier cierto preguntanan por wordo contesta, pero e ta di pensa cu tin algun hende cu por a saca nan conclusion caba “tur su preguntanan mester ta skerpi pero no kere cu esey ta un opinion cu e ta dunando, e kier haya contesta riba cierto preguntanan”, Kock a bisa.

Awor, loke ta sigui ta cu mester caba e ultimo sub-caso, despues e caso lo bay pa prome fiscal bin resumi kico e ta haya ta wordo proba si of no y ki castigo e ta pidi, despues e defensa di cada un di e sospechosonan ta bay tin un par di dia pa nan defende nan cliente unda nan ta espera cu por tin un veredicto prome cu fin di aña of cuminsamento di 2023.

Di su parti, Benny Sevinger a declara cu ayera e tratamento di e caso a bay den otro fase di e investigacion unda su mes no a haya hopi pregunta di e hues ni di fiscal, el a haya interesante cu fiscalnan a keda para riba cu e personanan mag di bende aandeling of cu cuanto placa ta kere cu nan por bende aandeling.

“Esey ta un momento cu mi mester splica e hues y recorda e fiscalnan cu den casonan aki nan ta acusa diferente personanan cu a haya un tereno riba nan compania, no riba nan nomber persoonlijke y na cierto momento a haya un oferta pa otro hende cumpra nan compania y nan no a rechasa e oferta aki y a bende nan companianan” el a bisa.

Den su opinion, Sevinger ta puntra con por ta cu fiscal di Ministerio Publico ta acusa e personanan aki di a haci esey unda cu siman pasa el a haya un carta di e mesun Ministerio Publico indicando cu nan a seponeer su declaracion pa motibo cu nan no ta mira ningun acto castigabel den dje.

Esaki ta trata di e denuncia cu Sevinger a entrega contra prome minister Evelyn Wever-Croes y Marisol Lopez-Tromp unda segun Ministerio Publico a señala “for di e documentonan cu a wordo entrega pa Sevinger, entre nan articulonan di corant, no a resulta di ningun manera hechonan y/of circunstancianan concreto cu lo por hiba na sospecho di un of mas hecho castigabel”.

El a puntra fiscal pa splik’e dicon den su caso ta haya actonan castigabel y den otro caso contra prome minister y Lopez-Tromp no, segun el a afirma “ta mesun cos y ta hopi mas pio, pasobra a splica e hues cu den casonan aki e hendenan aki ta pidi minister y pidi gobierno cu nan tin of nan ta bay busca partner y mi ta willing pa bende aandelingnan, no ta bisa gobierno ki sorto di deal nan tin, ni pa cuanto nan ta bende, den otro caso cu a mi a entrega nan ta bisa cu nos ta bay bende nos aandeling y nos ta pidiendo 17 miyon dollar pa esaki, den e caso ey Ministerio Publico ta bisa cu no tin nada malo eynan, pero den e caso aki si ta bisa cu tin algo malo”, Sevinger a declara.

Tambe, el a trece dilanti cu ta duidelijk cu tanto hues como fiscalnan no por haci e pregunta di cuanto placa Sevinger a haya y cu “riba tal rekenen bo tin tanto miyon loke a wordo poni door di contrincantenan politico di MEP, e ora ey mi ta puntra mi mes cu pa persecucion politico nos ta akiden awe y cu poco poco nan mes ta bay cuminsa ripara di na unda Sevinger a haya tur e placa ey? unda e bewijsnan ta di tur e miyonnan ey? ”

E ta keda puntra su mes dicon e ta wordo midi cu otro midi cu prome minister of cu Marisol Lopez-Tromp, esey ta e pregunta cardinal den henter e asunto aki manera el a sigura, “vrou di husticia no ta di e blind ey, depende ken bo ta nos ta persigui y depende di ken bo ta nos no ta persigui”, el a finalisa.