E buskeda pa e avion perdi, cual tabata hiba e futbolista Argentino Emiliano Sala na su ekipo nobo na Wales a wordo para temporalmente diamars anochi, cu autoridadnan sin speransa di haya sobreviviente den e Canal Ingles.
Polis a bisa cu obhetonan flotante a wordo mira riba e awa, pero nan no por a confirma si nan tabata di e avion cu a disparce for di e radar dialuna anochi, na e costa di Guernsey ora e tabata biahando for di Nantes.
Sala, di 28 aña di edad, a pasa e oranan anterior despidiendo di su compañeronan na e ekipo di futbol na e ciudad Frances, despues cu Cardiff a contrat’e pa un suma record siman pasa. “Despues di tur e tempo aki, ta basta friu, e awa ta hopi friu eyfo… mi no ta kere tin hende na bida ainda”, chief officer di e buskeda aereo di Channel Islands, John Fitzgerald, a bisa AP. “Nos no sa con e avion a disparce ayera. El a desvanece completamente.”
Autoridadnan no a haya niun pista di esunnan a bordo. “Si nan a cay riba awa”, polis di Guernsey a bisa, “e chens di sobrevivi, den e fase aki, desafortunadamente ta hopi chikito.” Wardacosta Britanico a ricibi un alerta dialuna pa 8.23pm for di control di trafico aereo na Jersey, e isla mas grandi di e Channel Islands, despues cu nan no a logra tuma contacto cu avion Piper PA-46 cu dos persona a bordo, segun polis di Guernsey. Autoridad di aviacion civil Frances a confirma cu Sala tabata un di e personanan a bordo.
Autoridadnan a busca pa un total di 15 ora. Nan a suspende e buskeda ayera anochi despues di bahada di solo. E ultimo post di Sala riba Instagram tabata un potret dialuna, cu e hungadonan di Nantes y e mensahe ‘e ultimo ayo’.
Cardiff a anuncia cu nan a firma Sala pa $19 miyon te 2022. E tabata na Cardiff siman pasa pa finalisa e transferencia, cu tabata wardando autorisacion internacional. E Premier League no a contesta si e transferencia a wordo completa. Un hungado poderoso y directo, Sala a iguala su total di 12 gol den su carera – logra durante e ultimo dos temporada cu Nantes – den 19 wega di Liga e temporada aki. E ta e di 5 anotado mas grandi di e liga Frances, net tras di delantero di Paris Saint-Germain, Neymar, kende ta e hungado mas caro di mundo. “E tabata un hungado bon educa, amabel y lief, kende tur hende tabata stima”, presidente di Nandes, Waldemar Kita, a bisa na CNews. Cardiff a cancela su sesion di training pa ayera, chief executive Ken Choo bisando cu e oficialnan di e club tabata ‘hopi angustia pa e situacion’.
“Nos ta keda resa pa noticia positivo”, Choo a bisa.
Sala, kende no a hunga pa ekipo nacional Argentino, tambe a hunga na Francia cu Bordeaux.
