UEA y Elmar negoshacion.JPG

E negociacion entre sindicato Union di Electricista Arubano (UEA) y gerencia di Elmar pa firma un Contracto Colectivo (CAO)pa cuater aña, ta canando keto bay apesar di e dificultadnan cu ambos parti a confronta riba caminda pa yega na otro finalmente.

Mediador di Gobierno, sr. Anselmo Pontilius a intermedia den e negociacion aki, despues cu e trahadonan di Elmar afilia na UEA a rechasa e pakete negosha.

Sr. Pontilius a reuni tanto cu dirigencia di sindicato UEA y tambe cu gerencia di Elmar pa asina analisa e situacion, y nan a reuni bek dialuna y ayera pa prepara un of mas alternativa.

Tin dos paso cu nan lo tuma: Un tin di haber cu Mediador di Gobierno a pidi gerencia di Elmar pa prepara un presentacion na tur trahado di e compania di utilidad aki. E presentacion tin di haber riba e cambionan cu Elmar ta bay tuma den e proximo cuater aña, durante e periodo di vigencia di e CAO cu nan ta negoshando actualmente.

Financiero y cambio di structura

E asunto aki no tin di haber exclusivamente riba e aspecto financiero, pero tambe cambionan structural cual tin tres punto cu trahadonan ta preocupa cu nan.

Sr. Pontilius den su rol di Mediador di Gobierno, sr. Pontilius ta haya cu despues di e splicacion cerca e trahadonan, y despues cu gerencia y sindicato UEA ta trata e proposicion cu su persona ta presenta, eventualmente otro siman UEA lo por presenta un resultado total na su miembronan y mira si nan lo por haya aprobacion cu lo nifica un CAO pa cuater aña.

“Logico e informacion cu e compania ta bay discuti cu e trahadonan ta hopi importante. Y na e mesun momento logico e contenido di e pakete cu nos a traha riba dje tambe ta importante pa e trahadonan nan sa kico ta nifica pa nan tanto di entrada directo y indirecto den e proximo cuater aña”, asina sr. Pontilius a declara na Bon Dia Aruba.

LEAVE A REPLY

Please enter your comment!
Please enter your name here