editorial 2_15_1.jpg

Antayera CAFT a publica su comentario riba e rapport di gobierno encuanto su estado financiero den prome kwartaal di 2016. Inclui den esaki a sali resultado di e investigacion cu CAFT a haci riba e proyectonan ‘PPP’ (Public Private Partnership), en special e dos proyectonan grandi ‘Green Corridor’ y ‘Watty Vos Boulevard’ (ringweg O’stad). CAFT ta yega na e conclusion cu, compara cu otro pais cu ta haci uzo di e concepto di PPP, e suma envolvi na Aruba compara cu su GDP, y tumando na cuenta tamaño di su teritorio y poblacion, ta hiba na un grado asina halto di inversion via PPP cu no ta comparabel cu ningun pais na mundo.

Den su analisis CAFT ta uza como comparacion e ehemplo di Turkia, cu ta e pais cu mas a y ta haci uzo di PPP. Na Turkia e sumanan envolvi ta yega na 1,5% di GDP, y den caso di Aruba esaki ta 19%, pa loke ta e proyectonan Green Corridor y Watty Vos Boulevard! Esey segun CAFT ta suficiente prueba cu e proyectonan PPP na Aruba, principalmente e dos nan menciona, ta di un magnitud excepcional, cu no ta haya ningun otro caminda. Tambe CAFT ta haci un comparacion cu otro pais den region di Caribe. Ta haya cu e averahe di inversion di PPP ta alrededor di 4% di GDP entre e paisnan, loke ta considerablemente menos cu loke ta e situacion na Aruba. Realmente nos por papia caba di abuso en bes di uzo di e concepto PPP, cu consecuencia pa e plan di renoba scol via PPP.

CAFT ta propone pa introduci un norma maximo pa e inversionnan via PPP. Esaki lo ta entre 1,5 y 2% di e presupuesto di gobernacion den sentido amplio, loke na Hulandes ta yama e ‘collectieve sector’, cu ta gobierno central plus e fondo y institucionnan defini como perteneciente na sector colectivo. Den su rapport pa prome kwartaal di 2016, gobierno ta propone pa considera como sector colectivo: gobierno central, AZV, SVB, Serlimar, Aruba Tourism Authority y Universidad di Aruba. Den su calculo di sector colectivo, CAFT a considera solamente AZV y SVB.

CAFT ta conclui cu, si e proyecto di ringweg continua, gobierno ta yega na 2,5% di inversion via PPP compara cu presupuesto di sector colectivo. CAFT ta bisa:” Pa sigura cu por reduci debe di estado den futuro cercano, y pa garantisa finanza publico sostenibel, cu esaki e espacio pa proyecto PPP nobo basa riba compensacion segun disponibilidad (‘beschikbaarheidvergoedingen’) a keda totalmente consumi.”  Segun e cifranan cu CAFT a publica, e compromisonan financiero di e proyectonan di hospital, Green corridor, Watty Vos Boulevard y edificio di Infrastructura (Wayaca) hunto ta yega na un pago anual di Afl. 64,8 miyon. No a tuma na cuenta e otro proyectonan manera e facilidadnan multi-funcional, e haf di Barcadera y  e edificionan di Husticia y di Impuesto, loke ta aumenta e suma anual den presupuesto considerablemente.

Pa loke ta e cifranan di e trimester concerni mes, CAFT manera tabata e expectativa, ta satisfecho cu gobierno a logra mantene su gastonan mas o menos den e limitenan estableci den presupuesto. Den su comentario CAFT no ta referi na e hecho cu gobierno a paga un suma di cuatro miyon mas pa Bienes & Servicio cu loke tabata presupuesta, pero tambe a aumenta e debenan pa e categoria aki (proveedornan local) cu 52 miyon den e mesun tres lunanan. Esaki tabatin como consecuencia cu e pagonan haci riba debe no tabatin un efecto asina positivo. Ademas den e periodo aki ainda no a fia placa pa cubri e deficit presupuesta y e renobacion di debe cu ta madura e aña aki, di manera cu e ‘mehoracion’ chikito di e total di debe lo mira un cambio negativo mas den aña.

Tambe ta señala cu te awor ainda no por dispone di e documentonan encuanto e acuerdo cu Citgo y Valero. Ta recorda gobierno riba e echo cu ta aprecia di haya un ‘MER’ (Milieueffectrapportage) pa por deduci kico ta e compromiso y riesgonan financiero cu gobierno ta asumi na momento di bira propietario di tur e facilidad y terenonan di e compania petrolero. Cu tur esaki, lo mester pospone tambe e decision kico lo mester bay haci si e acuerdo cu Citgo continua y bao ki condicion financiero. Di esey mester bay deduci despues cual ta e pasonan cu gobierno lo mester tuma of no pa no yega na un deficit mas grandi di loke ta planea, cu ta 2% di GDP pa 2016.

CAFT ta expresa su preocupacion pa e gastonan extra cu ta vislumbra den AZV, cu te na e momento aki no tin un claridad con ta bay cubri nan. E deficit ta Afl. 15,9 miyon, di cual 8,5 miyon ta debi na decision di gobierno pa baha su aportacion pa 2016. Otro parti ta bin di menos entrada spera di BAZV y di prima pa 2016. Gobierno por wel di ta baha su aportacion, pero na fin di aña pa ley lo mester cubri e deficit di AZV.

LEAVE A REPLY

Please enter your comment!
Please enter your name here