(AP) – Carnival Corp. a bisa siman pasa cu un violacion di data na maart por a expone e informacion personal di cliente y empleadonan riba e Carnival Cruise Line, Holland America Line y Princess Cruises.
Den un carta na clientenan, e compania a indica cu persona externo por a haya acceso na numbernan di Seguridad Social, number di paspoort, fecha di nacemento, adres y informacion di salud di algun persona.
E compania a nenga di bisa cuanto persona nan informacion a keda expuesto.
E hacking ta yega despues cu Carnival a bira victima dos biaha aña pasa di atake di ransomware (secuestro cibernetico).
Vocero di Carnival, Roger Frizzell a bisa cu e compania a detecta e intrusion di mas recien riba algun di su sistemanan di tecnologia di informacion riba dia 19 di maart y a shut down acceso y contrata un compania di seguridad cibernetico pa investiga. El a bisa cu Carnival ta haciendo cambio pa mehora seguridad di su sistemanan di informacion.
Frizzell a bisa cu e compania a notifica e personanan afecta y a set up un call center pa contesta nan preguntanan.
E compania basa na Miami a revela den un documento di seguridad na april cu hackernan a kibra drenta den nan sistema na augustus di aña pasa y atrobe na december. E atacantenan a codifica parti di un di e sistemanan di IT di e linea di crucero, y a haya acceso na informacion personal di cliente y empleadonan. Carnival a bisa cu no tin indicacion cu infomacion personal exponi den e atakenan en cuestion a ser malusa. E compania no a indica si nan a paga un rescate.
Accionnan di Carnival a cay 3% diahuebs.
