Awe mainta, sindicato di hospital ABV a ofrece un conferencia di prensa pa splica su puntonan di bista di e situacion cu a sucede fin di siman ultimo cu otro sindicato. Asina tambe a informa tocante un reunion na bestuurskantoor, den cual nan no tabata bonbini manera a keda sigura.

Gina Maduro, presidente di sindicato tambe a trece dilanti e situacion riba e parti di crisis y e parti financiero, unda cu sindicato ABV ta representa no hospital so, sino tur e institucion unda cu sindicato tin su miembronan.

El a menciona cu desde cu gobierno a anuncia cu lo mester bay pa e parti di ‘solidariteit’ cu a bin cu e parti di 12.5%, esey tabata pa trahadonan publico. Minister presidente Evelyn Wever-Croes a manda e carta tambe pa N.V. y pueblo completo, pa asina tambe contribui pa e parti di solidaridad, esey tambe ta conta pa sector di cuido.

Maduro a declara cu e diferencia grandi ta cu sindicato ABV ta representa sector priva, fundacionnan, stichting, sui generis, tambe SABA, Imsan, Respaldo y Hospital cu ta diferencia di e parti gubernamental. Na momento cu tin un CAO (contracto colectivo), si tin cambionan den parti primario y secundario, ta logico cu e dunado di trabou tin cu bay mesa cu sindicato y nan conhuntamente ta delibera y evalua pa wak con ta bay cumpli cu e parti di reduccion.

Den SABA, ABV a reuni cu su gerencia, nan a scoge pa baha gasto operacional den diferente parti y tambe a purba di no mishi cu salario di trahado di SABA. Tampoco ta mishi cu vakantie uitkering, pero nan mester entrega nan bono di luna di augustus y november na 100%. Tur esey ta un suma total di 6.3% y gerencia di SABA ta corta den gasto operacional y asina nan ta yega e suma di 12.5%.

Den e caso aki, SABA mes a scoge pa haci’e asina, Maduro a afirma. Tambe el a bisa cu ta keda na cada instancia pa e dunado di trabou hunto cu e sindicato evalua con ta haci e reduccion.

Hospital cu ta esun di mas grandi, cu tin mas di 1.000 trahado tabata esunnan di mas dificil y a reuni simannan largo y a discuti pa purba mantene tambe, pa no mishi cu salario di trahado. Tambe di mesun manera cu otro institucionnan pa cumpli cu e 100% di salario y 100% di uitkering.

Pa loke tur e fundacion y stichting cu ta forma parti di institucionnan di cuido desde luna di april a entrega caba, Maduro a anuncia, ademas a comenta cu e suma cu nan tin cu haya pa luna a wordo corta caba 5%. Esey ta keda na dunado di trabou di cada fundacion con e ta saca su cuenta pa paga salario y pa paga gastonan operacional.

“Mi ta kere si nos papia di entrega, nos sector ta e prome cu a entrega”, Maduro a aclaria.

Di mesun manera, el a duna di conoce cu nan a sinta cu sindicato FTA, esun di mas grandi den sector priva, conhuntamente cu ATIA y tur stakeholder di cuido como HAVA y nan a manda un carta pa gobierno, pa asina splica e parti di 5 miyon cu nan mester entrega y ki efectonan esaki lo trece.

El a comenta cu esey tabata un di e condicionnan cu Hulanda a pone pa paga FASE y subsidio di salario. Awor nos por a mira cu AZV a anuncia un lista di medida pa purba cera, pa motibo cu mester corta 5 miyon florin pa luna.

Asina mes, Maduro a informa cu entrante luna di juli te december e salarionan di hospital ta baha cu 5%, di e cual el a laga sa cu awe mainta tambe mester tin un reunion cu gerencia pa wak con lo corta esey.

Aparte di esaki, interno vesparing tambe tin cu entrega 10% den un aña, locual ta suma 18 miyon florin. A menciona tambe reduccion di FTE: “Ora bo ta tende reduccion di FTE, esey ta nifica manda hende cas”, Maduro a señala.

Den aparato gubernamental, Maduro a bisa cu ta casi 8.000 ambtenaar, ‘te ainda mi no a tende di manda hende cas, pero den sector priva tin 80% na cas caba sin trabou y 20% cu ta laborando y ta riba un hilo’.

Pa e motibo aki, el a expresa cu e no ta compronde cu sindicato di polis STA por compara sector priva cu un aparato gubernamental, nan ta dos diferente. “Sector priva ta mas grandi cu sector publico, pero nan ta esun cu no kier colabora.”

Asina mes, el a manifesta cu ABV a wordo invita pa un reunion di gobierno na Bestuurskantoor dialuna ultimo hunto cu otro sindicato, y ora nan a yega na e reunion, nan a ripara cu nan presencia no tabata bonbini. Maduro a afirma cu na momento cu reunion a cuminsa cu minister di Finanzas, Xiomara Ruiz-Maduro kier a duna un presentacion di cifranan di ultimo luna di mei di e situacion di e pais. E otro sindicato cu no tabata contento cu presencia di ABV a pidi pa ABV sali for di e reunion, loke na final nan a dicidi di haci.

Prome cu esey, Maduro a informa cu el a ofrece algun palabra specialmente pa sindicato STA, pa papia tocante e accion di walk out cu nan a haci diasabra ultimo: “Prome cu bo bay den accion bo por coy telefon y yama. Bo sa ken mi ta, pa puntra con a bay, en bes di haci un walk-out di dos ora diasabra anochi iresponsablemente.”

Ademas, Maduro a declara: “Polis continuamente ta yama nan frontliners, pero nan no ta frontliners, nan ta first responder. Tin un diferencia, nan ta den un triangulo cu ta ambulance, bombero y polis. Frontliner ta e ora bo ta yega na SEH dilanti.”

Asina mes, el a declara cu frontliner ta personanan cu a studia, drenta klas y bay un opleiding di cuatro aña y otro estudionan. “Anos ta esun cu ta atende e pashent”,Maduro a finalisa.

 

LEAVE A REPLY

Please enter your comment!
Please enter your name here