Fundacion Eliezier ta un fundacion cu ta enfoca ariba ayudo pa adictonan riba caya. Ayera 5 di januari den un conferencia di prensa cu algun medio di comunicacion, fundador di Fundacion Eliezer, Gino Frans a celebra 26 aña di sobriedad. El a conta un poco di su historia y con el a aire na celebra 26 aña sobrio.

“Tur aña dia 5 di januari mi ta celebra e dia grandi cu mi a haya un liberacion. Dios a libera mi di droga, alcohol, caya, hopi cos mas cu Dios no ta agrada. Pero awe mi por para firme y mi por bisa awe mi a cumpli 26 aña liber di droga,” Frans a expresa.

El a conta cu anteriormente e tabata rehabilita, cay back, rehabilita, cay back. El a enfatisa cu ora el purba rehabilita cu Dios, esey tabata e ultimo biaha. “Dios a mustra mi cu por y mi kier bisa tur hende purba cu Dios.”

Frans a indica cu den e ultimo tempo e ta mirando hopi mucha jong ta subi caya y nan no sa kico nan ta haciendo. El a remarca cu practicamente nan ta usando droga pa pertenece na un grupo y nan ta usa droga sin sa kico ta bay pasa cu nan.

“Bo ta kere bo ta fuerte, pero caba e ta caba cu bo. Ami mes tabata un di nan cu a kere cu tur cos ta bay bon, mi ta fuerte, mi ta guy grandi, masha cos mi ta sinti mi, pero poco poco el a sink mi full cu mi a lastra hasta riba caya,” el a bisa.

Despues di rehabilita y sali di su adiccion, Frans a lanta un fundacion pa asina dedica na yuda otro adictonan riba caya. El a splica cu e yudamento di hende e ta yudando su mes tambe, pasobra cada hende cu e yuda e ta wak su mes den dje.

“Droga ta mescos cu un cancer, e sintomanan ta mescos. E adicto ta cuminsa poco poco te cu bo ta sink, pasobra ariba bo no ta bay, ta abao bo ta bay. Cada persona cu mi yuda mi ta yudando mi mes tambe, pasobra esey ta yena mi, e ta yena mi cu gozo, pasobra mi no kier pa nan ta riba e caminda ey. Anto mi trabao ta yuda nan pa nan tambe para firme, mescos cu ami por y Dios a yuda mi, e por yuda otro tambe. Esey ta nos meta,” Frans a resalta.

Hunto cu Frans tabata Sr. Anthony Arends, un persona cu Fundacion Eliezer a lucha cune hopi pa sali di e adiccion, pero na final nan a logra yud’e. Frans a enfatisa nan ta conta e experiencianan aki, no pa gaba, pero pa demostra cu e trabao cu nan ta haci tin fruto y a traves di nan, cu ta e adicto, nan por influencia mas ainda e otro adictonan riba caya.

“Ora bo ta un adicto, bo a rehabilita y bo ta un ex-adicto, bo tin hopi influencia riba esun riba caya. Nos mester di otro y tur esnan cu a studia p’e, cu tur respet, nos mester di nan, pero nan tambe mester di nos. Nos ta hendenan cu a wordo rescata di caya,”, el a agrega.

Anthony Arends, ex-adicto cu a rehabilita cu ayudo di Fundacion Eliezer, ta conta cu el a cuminsa cu 17 aña caba riba e caminda di adiccion. El a cuminsa cu sigaria y despues di sigaria el e sigui den cosnan mas fuerte manera alcohol y cocaina.

“Bo ta kere bo por bay bin cune, pero ta yega un momento cu e ta bay domina bo, ta yega un nivel cu bo ta kere cu bo por cune, pero e ta bay domin abo completamente y bo ta perde famia, bo ta perde trabao, bo ta perde cosnan hopi importante den bida,” Arends a indica.

El a splica cu el yega di purba varios biaha di sali di adiccion y un di e puntonan cu ta importante pa logra rehabilita, segun Arends ta remarca, ta busca Dios. “Sin Dios bo no ta bay logr’e y esey ta 100%, pasobra ami a haya oportunidad danki na Dios.”

El a sigui splica cu aworaki tambe el a tuma e decision na serio y a dicidi cu ta suficiente. “Mi ta kere bo edad ta subi, bo ta wak kico ta pasa riba caya y tur esey ta hunga un rol hopi importante,” el a agrega.

Aworaki Arends ta yegando atrobe un aña completamente limpi y ta duna danki na Dios pa logro aki. Danki Dios mi ta yegando un aña y mi ta sinti sublime. Mi ta lanta mainta cu un gana, cu un smaak, cu gana di lucha. Contrario na ora e tabata den e mundo ey, e ta completamente diferente. “Bo no sa ki ora ta dia, ki ora ta anochi, bo no sa nada.”

Por ultimo Arends a subraya cu el a rehabilita y ta yudando na Fundacion Eliezer pasobra e kier ta un ehempel pa otronan. “Manera Gino ta un ehempel, mi tambe kier ta un ehempel. Mi kier sigui yuda hende pa locual ami a pasa aden, nan no pasa aden.”

LEAVE A REPLY

Please enter your comment!
Please enter your name here