director nobo dep asunto social.jpg

“Despues di un proceso largo caminda a bay en busca di un director nobo pa Departamento di Asunto Social, finalmente siman pasa Sra. Glenda Hernandez a keda nombra oficialmente dor di Conseho di Minister”, asina Minister di Asunto Social, drs. Paul Croes a duna di conoce durante un entrevista.

For di un total di 19 persona, Sra. Hernandez a resulta di ta esun mihor capacita pa cumpli cabalmente cu e funcion importante aki. Ta trata di un yiu di tera cu amplio experticio y experiencia den e tereno social, particularmente riba e aspectonan di bijstand, subsidio, entre otro. Su trayectoria ta inclui funcionnan na fundacion, como tambe municipionan di Hulanda.

Basa riba esaki y otro puntonan mas, e titular di Asuntonan Social tin confiansa cu Sra. Hernandez lo sa di desempeña e diferente debernan cu ta bin cu su posicion nobo. Nombracion a bin despues cu un comision di e Ministerio en cuestion, hunto cu Departamento di Recurso Humano (DRH) a scoge pa propone Sra. Hernandez for di un grupo di 19 candidato.

“Nos a ricibi peticion di hopi candidato cu hopi potencial pa e funcion aki. Nos ta consciente di e retonan cu e departamento ta afronta y di su importancia den e bienestar di su clientenan; pesey a pasa over di e proceso di seleccion dedicando hopi seriedad y enfoke,” asina Minister Croes a comenta.

E mandatario a sigui señala cu “E tarea primordial di un director nobo ta pa impulsa e departamento aki padilanti. Mehora e servicio social, atende cu e posicion huridico di e trahadornan, motiva cada trahador y seccion di e departamento y mehora e maneho di informacion pa asina stipula un maneho social pa termino largo.”

 

LEAVE A REPLY

Please enter your comment!
Please enter your name here