Riba dialuna 3 di februari 2020, Gobernador interino, Yvonne Lacle-Dirksz, a huramenta Sr. mr. J.M.J. Keltjens como vicepresidente di Corte Comun di Husticia, cu sede na Aruba.

Segun un comunicado di prensa, prome cu Sr. Keltjens  a yega Aruba, e tabata magistrado (senior-rechter) y presidente di e team di comercio (team handel) na e Corte di Den Haag.

E ceremonia di huramentacion a tuma luga na Cas Ceremonial di Gobernador, den presencia di entre otro Minister di Husticia, Procurador General interino, manager di establecimento (vestigingsmanager) na Aruba di Corte Comun di Husticia y e vicepresidente di beheerraad.

Corte Comun di Husticia di Aruba, Corsou, St. Maarten y di Bonaire, Sint Eustatius y Saba ta percura pa hurisdiccion den prome instancia y den apelacion (hoger beroep) na e islanan. Corte di Prome Instancia na Aruba tin sede na Aruba y e audiencianan tambe ta tuma luga eynan. E miembronan di Corte Comun di Husticia ta trata, casonan civil, casonan penal y casonan di maneho administrativo hudicial (cu ta inclui casonan fiscal) tanto den prome instancia como den apelacion.

LEAVE A REPLY

Please enter your comment!
Please enter your name here