Den e edicion aki un relato tocante un carta cu Gobernador a haya necesario manda pa presidente di Staten algo mas cu un aña pasa. E momento di e carta tabata den e controversia cu a surgi tempo cu na mitar di october 2020 tabatin e tumultuoso reunion di Staten unda tabatin tres mocion riba mesa, un di nan di fraccion di partido grandi apoyante di gobierno, contra ministro di Infrastructura. Manera hopi a vocifera na e momento ey, e interpretacion di Constitucion y di Reglamento di Orden di e presidente di Staten tabata eroneo y como tal su decision di tene votacion mientras claramente no tabatin e quorum requeri den sala, a resulta den mocion nulo y no valido.

Despues di un bishita cerca Gobernador, unda despues obviamente e presidente no a duna di conoce loke a discuti, algo corecto riba su mes, Gobernador a tuma e iniciativa pa manda un carta pa e presidente, no a titulo personal pero como presidente di Staten, unda e ta pone ‘de puntjes op de i’ pa e presidente. Aparentemente e no a keda contento cu loke e presidente a declara despues, ya cu e carta ta data di despues di e conferencia di prensa unda e presidente a declara cu su decision no tabata corecto y cu enberdad e mocionnan a keda declara nulo y no valido.

Pero e carta ta bisa cu ta aprecia cu el a haci esey, pero de paso ta lamenta cu durante e rueda di prensa e presidente a persisti cu e Reglamento di Orden no ta exigi cu mester tin un quorum durante henter e votacion. Gobernador ta haya esaki un interpretacion eroneo di Constitucion y Reglamento di Orden y a manda e carta, aparentemente pa evita cu den futuro lo keda mira e eror aki ripiti. Ta parce nos cu aki ta presenta un caso cu pa varios motibo ta excepcional y singular. Pa cuminza, ta duna e impresion cu a palabra algo otro entre cuatro muraya, pero cu den e rueda di prensa e presidente atrobe a purba di hustifica su posicion bisando cu Reglamento di Orden no ta bisa cu mester quorum durante henter e votacion… un manera infantil di purba haya razon toch, mientras bo mes a pone rueda di prensa pa anuncia cu loke bo a haci un par di dia antes no tabata bon. Y ta ken a mand’e bisa esey? Gobernador? E lo a bisa cu e no ta firma nada a base di e decision ilegitimo di Staten? Y a palabra cu no ta contradeci e conclusion di e eror cometi pa e presidente di ningun manera? Nos no mester sa kico a bisa y palabra exactamente eyden. Loke papia cerca Gobernador ta keda entre e cuatro murayanan ey. Pero e carta di Gobernador, cu mester tabata conoci pa parlamento basta tempo caba, no a yega na man di prensa te awor.

Den ningun sentido su publicacion awor ta bay cambia algo na e sucesonan di e tempo ey, resultando den e retiro di e ministro di Infrastructura. Pero si nos ta sinta cu e consecuencianan cu e sucesonan tin pa futuro parlamentario y mas general gubernamental di nos pais. Ta importante pa nos clarifica un par di cos. Na promer lugar, pakico tabata existi un situacion cu a haci cu Gobernador a haya necesario pa sali afor cu un carta di su mes, sin firma acompañante di ningun ministro, pa coregi actuacion di presidente di Staten? Kico tabata posicion di gobierno di Aruba na e momento ey? Nan tabata apoya e presidente den su insistencia infantil? Ta pesey ningun ministro a pone su firma bao di e carta aki? Of nos mester mir’e como un instruccion cu Gobernador a ricibi di Rey y no den su calidad di hefe di gobierno di Aruba? Y si esey ta asina, kico gobierno actual, cu e mesun Promer Ministro, ta haya di e asunto? No por bisa cu ta algo cu Gobernador a haci riba su mes, y como cu ningun ministro a firma y Gobernador ta intachable, anto ningun hende ta responsable? Y asina mes, si gobierno kier laba man pa loke a pasa e tempo ey, kico ta e posicion di gobierno awor tocante e interpretacion cu e presidente a duna na Constitucion y Reglamento di Orden? Nos parlamento mester keda na merced di loke un presidente, tambe den futuro, hinca den su cabez haci? Y si bin uno cu ta mas infantil y bruha cu esun cu a bay? Ta Gobernador mester par’e atrobe? Pa mas y mas nos haya nos cu e situacion indesea cu Gobernador ta sali for di su papel di intachable pa drenta arena di opinion politico y di interpretacion di ley?

Nos ta kere cu na e altura aki no ta cuestion mas di opinion. Ta trata di consenso riba interpretacion corecto den asuntonan asina fundamental pa funcionamento di e organonan halto di estado. Esaki no por depende di decision di un persona, pasobra e ora nos ta na nivel di un favela, unda ‘mob boss’ ta dicidi segun e beis cu el a lanta cune. Nos ta kere cu ta bira tempo pa un Corte Constitucional, pa dicidi den e tipo di caso aki, pa libra Gobernador di funciona como consehero legal, y corector, di entidad estatal. Esey no ta su papel.

LEAVE A REPLY

Please enter your comment!
Please enter your name here