Ayera, den su resumen diario riba desaroyonan di pandemia di coronavirus na Aruba, Departamento di Salubridad Publico (DVG) a informa cu segun su datonan, ta registra un averahe semanal di 13 caso nobo di Covid-19 pa dia na Aruba den ultimo siman.

Igualmente, DVG a informa cu tin un averahe di tasa di positividad semanal di dies porciento pa dia.

DVG a informa tambe cu ayera tabatin 13 persona cu a recupera di e malesa causa pa e virus SARS-CoV-2, y a registra un total di 14 caso nobo di Covid-19, di cual uno no ta residente. E cifranan aki ta representa un tasa di positividad entre nos residentenan di nuebe porciento.

E cantidad di caso activo di Covid-19 ayera tabata 163, y e cantidad di fayecido no a conoce aumento y ta keda na 172.

Actualmente tin na Aruba dies persona hospitalisa pa Covid-19. Di esakinan, un persona ta den Unidad di Cuido Intensivo (ICU), y riba piso general tin nuebe persona. Ademas, na Colombia tin actualmente dies pashent di Aruba den ICU y otro dos persona riba piso general pa ricibi tratamento pa Covid.