Yvonne Lacle-Dirksz tabata e Gobernador interino di Aruba pa e ultimo cinco añanan. El a sirbi pais y reino di un manera ehemplar asistiendo cu conseho y guia, te ayera 1 di december, na unda cu den Parlamento di Aruba a ricibi Agustin Vrolijk como Gobernador interino nobo.

Manera ta stipula den articulo 14 paragraf 2 di e Reglamento di Gobernador di Aruba, e Gobernador interino ta acepta su encargo door di entrega un copia di e Decreto Real encuanto su nombramento y un proces-verbaal di su huramentacion na Parlamento, durante un reunion solem di Parlamento di Aruba.

Conseho di Minister di Aruba a postula señor Agustin Vrolijk como Gobernador interino nobo di Aruba. Durante di e Rijksministerraad di 26 di november ultimo, a aproba esaki. Su Mahestad Rey Willem-Alexander a nombra señor Vrolijk pa medio di un Decreto Real (koninklijk besluit) diamars ultimo 30 di november, unda e Gobernador interino nobo a huramenta den presencia di Gobernador di Aruba, Su Excelencia Alfonso Boekhoudt. Rey Willem-Alexander a apunta Gobernador Boekhoudt pa esaki.

Ayera Parlamento di Aruba tabata den un reunion solem pa asina duna bonbini na Gobernador interino nobo cu su discurso, e cual tabatin e presencia di prome minister Evelyn Wever-Croes, minister, parlamentarionan y diferente invitadonan.

Darlaine Guedez-Erasmus, Raymond Kamperven y Marisol Lopez-Tromp tabata e parlamentarionan apunta pa e comision di recepcion y despedida.

Su excelencia Gobernador interino Agustin Vrolijk den su discurso a trece dilanti cu el a wordo nombra como Gobernador suplente di Aruba, na unda cu Rey Willem-Alexander, hefe di Reino Hulandes, a firma e decreto real. El a gradici esnan cu a haci posibel su nombramento, pa cual su famia y e mes a sinti honra.

E tarea di Gobernador – y den caso di su ausencia, di Gobernador suplente – ta consisti di dos parti, manera el a splica. Gobernador ta representa e pais y gobierno di Aruba, e Gobernador ta representa gobierno den Reino, den lectura di e texto di huramentacion ta para cierto puntonan cu e representante di Rey lo mester tene su mes na dje.

Esakinan ta entre otro cu pa haya e posicion aki e no a priminti ningun hende nada, cu e lo promove e adelanto di Aruba manteniendo su mes na e Constitucion di Aruba y reglamento di ordo pa Gobernador. “Mi a pidi Dios todo poderoso pa yuda mi cu mi ehecucion di mi funcion honorabel nobo, pa sigui guia mi pa sirbi mi pais dignamente. Experiencia den casi 40 aña den trabao di gobierno, lo yuda mi tambe.”

El a continua: “Sr. presidente awe mi ta para aki no solamente pa presenta mi mes na Parlamento y representantenan di comunidad Arubano, sino tambe pa declara mi boluntad pa traha pa progreso di Aruba”, el a sigura.

Igualmente, el a bisa cu Aruba a pasa den un tempo dificil mescos cu paisnan grandi “y ainda nos ta nabegando. Pero e awanan no ta trankilo, ainda ta bin olanan grandi cu ta stroba nos bay dilanti y hunto nos tin cu percura pa coordina, controla y guia pa evita peligernan mayor. Fuera di e dificultadnan actual ya nos sociedad tabatin situacionnan cu mester solucion o la menos hopi atencion di nos tur”.

Tambe el a señala cu educacion y enseñansa ta un di e pilarnan cu ta sostene nos sociedad y tin hopi influencia riba e desaroyo total di pueblo di Aruba. “Loke mas ta preocupa nos ta educacion. Si e pilar aki ta faya, ta crack, ta kibra, esaki lo causa problema grandi den nos sociedad. E fayonan tin ripple efect y ta wordo sinti den tur ramo di nos sociedad. Nos ta mira y lastimamente hende grandi tambe ta mustrando un falta pa loke ta e virtudnan manera respet pa nan mes y respet pa otro, disciplina, tolerancia, convivencia, husticia, empatia y sentido di responsabilidad”, su excelencia Gobernador interino Agustin Vrolijk a sigura.

Continuando su discurso, el a splica cu e maestronan tin cu siña nan yiunan, lidernan den comunidad y comunidad en general ta demostra kico e virtudnan ta y con ta practica nan. “Ta un interaccion entre hende, esnan cu no ta practica e virtudnan aki naturalmente no por pasa nada pa niun hende. Loke nos muchanan ta siña ta loke nan ta mira di hende grandi.”

Igualmente el a comenta cu hubentud y sociedad en general mester wordo fortaleci den nan ser humano, “y esaki no ta cosnan material, pero cu bon ehempel guia pa biba segun un bon virtud universal. Futuro di Aruba ta bay depende di kico nos hubentud ta bay haci den futuro. Esaki ta trece cune cu mester cooperacion, participacion, mente habri pa acepta opinion di otro y crea harmonia den pueblo, sociedad en general cu mester practica e bon virtudnan…”

 

Esey tabata parti di e discurso di su excelencia Gobernador interino Agustin Vrolijk na Parlamento di Aruba ayera mainta.

Agustin Vrolijk ta un persona cu despues di a cuminsa su carera den sector educativo, despues di a sigui estudionan di ley aki na Aruba y despues specialisa den derecho aereo y espacial na Canada. Señor Vrolijk a haya añanan di experiencia laboral como abogado den sector di aviacion. Di 1987 te cu 1995 el a eherce e funcion di Hefe di Asuntonan Huridico, Economico y Internacional na Directie Luchtvaart Aruba (DLA), entre 1995 te cu 1999 e tabata Director interino na e instancia aki. Durante di algun luna e tabata secretario di e Comision Siguridad y Combatimento di Terorismo. Di 2002 te cu 2012 señor Vrolijk a eherce e funcion di director na Directie Buitenlandse Betrekkingen (DBB). Despues, pa un temporada cortico el a eherce un puesto di maneho na Aruba Airlines, cu dedicacion specificamente pa e aerolinea por bira operacional.