Gobierno di Aruba a firma e acuerdo cu Citgo pa cu e refineria. No ta conoci si Valero, e doño actual di e refineria tabata presente.
Aki por mira un video di e firmamento den presencia di Nicolas Maduro, presidente di Venezuela.
Esaki ta e relato cu gobierno a manda prensa:
10 di juni: Un dia historico pa Aruba!
Pais Aruba y Citgo Petroleum Corporation a firma acuerdo pa opera refineria na San Nicolas
Un acuerdo cu ta tene na cuenta e aspecto green cu e refineria tin di atene su mes na dje
ORANJESTAD / CARACAS – Pais Aruba y Citgo Petroleum Corporation a firma un acuerdo final cu esencialmente ta nifica cu e compleho petrolero na San Nicolas ta habri su portanan bek, oficialmente, prome di augustus proximo. Prome cu esey, e acuerdo entre Pais Aruba y Citgo mester haya conseho di Raad van Advies y wordo ratifica den Parlamento di Aruba. Ta spera cu tur esaki ta pasa den luna di Juli.
Na Palacio Miraflores, sede di gobernacion di gobierno di Venezuela y na unda e despacho di presidente di e pais ta situa, a firma un total di tres acuerdo, banda di varios acuerdo mas chikito cu a keda firma durante e dia. E acuerdonan principal ta e “Definite Participation Agreement”, “Refinery Lease Agreement” y e “Terminal Lease Agreement”. Firmantenan tabata Prome Minister di Aruba mr. Mike Eman, Minister di Economia, Comunicacion, Energia y Medio Ambiente ing. Mike de Meza, dr. Nelson Martinez presidente di Citgo Petroleum Corporation y Minister di Petroleo di Venezuela y alabes presidente di PdVSA, ing. Eulogio Del Pino.
E acuerdo aki tabata uno hopi importante y su importancia por wordo midi tambe den tamaño. Expertonan den e materia ta splica cu e acuerdo cu a uza pa habri e refineria di Coastal na 1989 tabata uno di 30 pagina. E acuerdo entre Citgo Petroleum Corporation, poniendo tur documento hunto, ta suma na mas di 2000 pagina. Esaki ta un muestra di un diferencia grandi den e proceso di negociacion cu a tuma luga entre Aruba, Citgo y PdVSA.
Pa prome biaha den su historia, Aruba ta doño di e compleho petrolero situa na San Nicolas y ta lease e compleho na Citgo cu ta bay opera esaki como un upgrader di crudo Venezolano. E inversion cu Citgo ta bay haci pa rehabilitacion di e planta ta bay ta entre $750 miyon pa $1000 miyon y ta bay tuma un periodo di 18 luna segun plan.
Segun analistanan internacional, e refineria na Aruba ta e alternativa obvio, preferibel riba construccion di un propio refineria pa Venezuela. E lease di e refineria na Aruba ta mas viabel, ta costa menos y ta tuma menos tempo pa cuminsa cu procesamento di e crudo pisa. Pa Aruba, e convenio cu Citgo ta uno hopi importante, specialmente si mira cu Aruba ta lease e refineria na Citgo pa un total di 20 miyon dollar anualmente y Citgo ta paga un minimo di 10 miyon dollar anualmente di impuesto riba ganashi. Esaki ta banda di tur otro impuesto cu e refineria ta bay genera, manera loonbelasting, AOV AZV etc.
A base di tur e puntonan menciona, “e refineria na Aruba ta masha importante pa e crudo di Venezuela. Sin e posibilidad pa aumenta nan produccion, e economia di Venezuela no ta crece,” e experto Arubiano Alvin Koolman y miembro di e team negociado a splica den un entrevista algun siman atras.
Prome cu e ceremonia di firmamento oficial, e delegacion di Aruba a tene reunionnan gran parti di dia den edificio principal di PdVSA na Caracas. Despues di e ceremonia na Miraflores, e delegacion di Aruba, den un caravana escolta pa polis, a transporta nan pa aeropuerto pa sali mesora bek pa Aruba, na unda un multitud grandi di hende ta warda e delegacion pa un evento di celebracion na porta di e compleho petrolero na San Nicolas.
E delegacion di Aruba tabata consisti di Prome Minister mr. Mike Eman, Minister di Economia ing. Mike de Meza, Minister di Labor drs. Paul Croes y miembronan di e team negociado incluyendo hurista mr. Hans Sjiem-Fat, Alvin Koolman y Richard Arends entre otro.
Comments are closed.