Tabata durante e reunion solomne cu a tuma lugar dia 5 di januari cu Aruba su Gobernador, sr. Alfonso Boekhoudt a pidi pa pone e asunto di su nombracion tras di lomba, referiendo na e manera con e proceso a tuma lugar. Un dia despues di e reunion nos por tuma nota cu pa Gobierno simplemente e cos no a caba.
Riba medionan social por a ripara hopi comentario riba e hecho cu durante e reunion solemne tabata tin presencia di apenas tres minister. Pa hopi e ausencia di e seis otro ministernan tabata un muestra di falta di respet pa Su Excelencia Gobernador Boekhoudt, kende ta e di cuater Gobernador di Aruba. Diabierna dia 6 a tuma lugar e prome fiesta di bon bini pa S.E. Gobernador Boekhoudt y aki e ausencia tabata mas grandi ainda di parti Gobierno. No tabata tin ni un minister presente y di e 12 parlamentarionan di fraccion di AVP, solamente dos tabata tey.
E ausencia aki ta uno historico pa ambos evento y di reaccion cu Bon Dia Aruba a ricibi di diferente persona, e ta wordo categorisa manera algo ‘kinderachtig’. “Gobierno simplemente no kier laga bay na e asunto aki y acepta cu Boekhoudt ta nan hefe awor”, tabata reaccion di un persona hopi conoci den comunidad pero cu a pidi pa keda anonimo.
Bon Dia Aruba a purba tuma contacto cu Prome Minister Mike Eman pa un reaccion pero te na e momento aki no a logra ainda. Lo trece e otro banda di medaya asina cu tin esaki.
