Segundo screening pa cancer di cuero

Riba 14 y 15 di januari ta bay tin un segundo screenmento di cancer di cuero ofreci na e comunidad di Aruba. Riba dia 14 di januari esaki lo tuma luga na na Stadionweg 16, cerca e luga di Dr. Nuris Lampe. Riba e siguiente dia e ta bay ta na Witgele Kruis St. Cruz. Dr. Lampe ta splica Bon Dia Aruba cu tin hopi pashent di cancer di cuero cu a desaroya esaki na un edad halto pa motibo di daño haci na un edad jong.

“Esey ta un cos cu nos tin cu ta consciente di dje. Mayoria di biaha e daño solar ta wordo haci na hopi jong anto na edad hopi grandi bo ta cuminsa haya e cancer. Anto eynan e problema ta sinta.” E screenmento ta un evento cu a wordo haci na aña 2013 anto awor ta bay ripiti pa locual ta trata despistamento di cancer di cuero.

Presente den esaki ta bay ta tres dermatologo cual ta Dr. Lampe, Dr. Oduber y Dr. Kock. Un di e cancernan cu nan kier despista mas hopi ta ‘melanoom’ cual ta esun mas peligroso, segun Dr. Lampe. Pero en principio e screenmento aki ta pa tur tipo di cancer di cuero. “Nos ta consciente cu cancer di cuero ta un di e cancernan mas frecuente na mundo anto Aruba no ta un excepcion. Mastanto pasobra cu nos ta den e parti tropico caminda e solo ta hopi fuerte.”

Un di e causanan di cancer di cuero ta e solo cual den hopi caso ta e causa principal. Segun Dr. Lampe, tin hopi pashent cu cancer di cuero na Aruba anto cu e ‘vergrijzing’, nan ta haya naturalmente mas pashent. “Nos kier atende mas tanto cu e hubentud cu mester ta consciente cu e solo por ta peligroso. Pero tambe e hende grandinan mester sa cu nan mester bay na tempo pa nan haci e onderzoek y evita cu e cancer bira pio.”

Procedura di screenmento
E tres dermatologo ta bay check henter e cuero di cabes te pia pa wak si ta haya algun tumor. Si e tumor wordo detecta, e pashent ta bay haya un carta cu e ta bay hiba na su dokter di cas. Cu e carta ey e ta haya un ‘verwijsbrief’ pa e bin bek cerca e dermatologo pa haci tratamento. E pashentnan cu yega e dianan ey ta haya un formulario pa nan yena. Akinan e pashent ta yena nan informacion y si tin algun problema cual ta e prome paso. E examinacion ta tuma entre 5 pa 10 minuut.

Prevencion ta haci falta
Segun Dr. Lampe, mester mas control di cancer di cuero aki na Aruba. “Nos no ta bezig riba un campo preventivo hopi amplio.” Awendia segun e ta splica, e parti di prevencion a cay hopi mes di parti di e dokternan como tambe huisarts. “Si nos cuminsa cu algo asina anto sigui cu ne, mi ta kere den futuro nos ta haya mas hende cu ta dispuesto pa sigui haci mas prevencion. Riba tur enfermedad nos tin cu concentra riba e parti di prevencion. Nos tin cos cu ta yuda pero manera cu bo tin enfermedad, 100% curacion ta dificil.”