Aruba Airlines a haci un peticion na Gobierno pa un excepcion den e caso aki, pa solamente vuelonan di transito. E condicionnan aki ta den deliberacion keto bay, segun Premier Evelyn Wever-Croes a indica.

Gobierno a studia e peticion aki y a delibera hunto cu e compania aereo na unda cu a conclui den definicion di un cantidad grandi di condicionnan pa ta sigur cu si Gobierno duna e permiso pa transito so, lo no core riesgo di influx masal di persona. Siguridad di nos pais ta na prome luga.

E condicionnan aki, Aruba Airlines lo mester tene nan mes na nan, sigurando asina cu na momento cu e vuelo di transito yega Aruba, tur pasahero ta sigui transito pa Merca. Tambe ora e vuelo di Merca yega pa bay Venezuela, tur esunnan cu a bin riba e vuelo bay Venezuela bek.

Mientras tanto e Instituto Aeronautico Venezolano tambe a pone un condicion di nan parti cua ta e condicion di reciprocidad. Cu esaki nan ta conclui cu si duna excepcion pa Aruba Airlines, tambe mester haci esaki pa tur aerolinea Venezolano. Anto na e momento cu Venezuela bin cu e exigencia aki, Aruba Airlines mes a realisa cu no por duna excepcion.

E punto aki, Gobierno di Aruba a delibera basta riba dje den transcurso di siman pasa, y wak cua condicion por wordo poni riba mesa. Premier Wever-Croes a vocifera su opinion cua ta pa implementa e condicionnan riba mesa pa un luna, cu e siguridad cu lo no core niun riesgo pa motibo cu e condicionnan ta hopi stricto. Sinembargo, Gobierno di Aruba no tawata cla ainda cu esaki. Y despues cu a bin cu e exigencia di Venezuela di reciprocidad, Gobierno di Aruba a tuma e decision cu esaki lo no ta posibel, ni cuanto condicion cu por tin riba mesa.

“Por yega na palabracion cu Aruba Airlines, sinembargo no por yega na palabracion cu tur linea aereo Venezolano pa motibo cu no tin siguridad cu nan lo cumpli. Esaki a pone cu Gobierno di Aruba a hala tras y ta den deliberacionnan keto bay”, Premier Wever-Croes a duna di conoce.

Despues di esaki, Premier di Aruba a cuminsa mira riba otro alternativa pasobra excepcion no necesariamente ta e unico solucion. E mundo di aviacion ta un negoshi hopi complica pero amplio. Un circunstancia di pasado cu ta sirbi como ehempel awe ta Tiara Air. Un motibo pa cua Tiara Air a haya nan mes den problema ta pasobra Venezuela no tawata kier a paga nan, y Gobierno a duna Tiara Air un inyeccion financiero. For di Parlamento, teniendo cuenta pa niun hende perde trabou, Premier Wever-Croes, e tempo ey como Parlamentario, a bay di acuerdo cu esaki despues cu ATA a sugeri pa cubri e suma. Sinembargo, esaki no a yuda pasobra toch e compania aereo aki a keda cu e problema y a stop di existi. Pero, esaki ta un alternativa hunto cu otronan cu por alivia e peso di Aruba Airlines.

“E excepcion, cu e exigencia di Venezuela di reciprocidad, no por wordo ni considera pa motibo cu asina no por tin niun control. Cu esaki tambe nos por comprende cu tur dia e situacion ta keda cambia. Reunionnan ta sigui constantemente pa delibera kico ta e miho paso pa tuma, mientras cu cada biaha e informacion tocante situacion di frontera cu Venezuela ta keda cambia constantemente. Pero importante ta pa pueblo di Aruba sa, na prome luga cu pa awo, frontera ta keda cera y na di dos luga cu Gobierno di Aruba ta purba yuda unda cu por pa Aruba Airlines no hay’e den problemanan financiero”, Prome Minister Evelyn Wever-Croes a duna di conoce.