Contratista di Google regularmente ta scucha y revisa algun grabacion di locual hende ta bisa na e sistema di inteligencia artificial Google Assistant, via nan stem of mediante ‘smart speakers’ manera Google Home.
E compania a admiti cu personanan tin acceso na e grabacionnan aki, despues cu algun audio den lenguahe Hulandes a lek. Manager di producto di Google, David Monsees, a reconoce e lek den un blog post diahuebs, y a bisa cu e compania ta investigando e violacion.
Emisora Belga VRT NWS a ricibi mas di mil grabacion, notando den un storia cu algun di nan tabata inclui combersacionnan personal sensitivo – como tambe informacion cu ta identifica e persona cu ta papia. Google a bisa cu no tin informacion di cuenta di usuario asocia cu e grabacionnan, y e persona cu ta revisa tin instruccion pa no transcribi combersacionnan den background.
Pero reporteronan di VRT por a scucha hende bisando adres di cas den algun grabacion, y por a track e persona. Algun di e combersacionnan aki no tabata dirigi pa Assistant, y a pasa sea como zonido den background of como un grabacion eroneo ora Assistant a kere cu tabata papiando cune, pero no tabata e caso.
Google a bisa cu contratista ta scucha grabacionnan pa tin miho comprension di patronchi di lenguahe y accent. Su termino di uzo ta confirma cu e compania por uza e grabacionnan, bisando cu Assistant ‘ta graba bo stem y audio den servicionan di Google pa mehora reconocemento di lenguahe’.
Monsees a skirbi cu Google ta traha cu contratista rond mundo pa analisa e grabacionnan.
E terminonan di Google no ta bisa explicitamente cu ta hende revisando e grabacion, pero si ta bisa cu e data por wordo analisa mientras e compania ta update servicio of crea caracteristicanan nobo.
E compania a reconoce e aña aki cu su contratistanan ta scucha grabacionnan anonimo, como respuesta pa un reporte di Bloomberg, revelando cu Alexa di Amazon tambe ta uza contratista pa scucha e grabacionnan. Amazon a confirma e reporte.
E caracteristica di grabacion di Google por wordo paga, pero esaki ta nifica cu Assistant ta perde su toke personal. Hende cu paga esaki ta perde e habilidad pa Assistant reconoce stemnan individual y siña bo patronchi di stem.
Grabacion di Assitant ta paga den default – pero e tecnologia ta urgi usuarionan pa cende e grabacion y otro herment pa ricibi caracteristicanan personalisa.
