Luto

Mayan den oranan di merdia ta bay tin un ceremonia di bandera unda ta hisa e bandera di Hulanda y Aruba halfstok na Bestuurskantoor, na tur otro edificio di gobierno, na edificio di VNO, scolnan y embahadanan. Tambe ta tene un minuut di silencio. Esaki gobierno di Aruba ta informa:

“Di e forma aki gobierno di Aruba y comunidad ta uni nan mes na e luto nacional na Francia unda cu diabierna ultimo mas cu 130 hende a perde nan bida y hopi ta luchando pa sobrebibi e atentado terorista, cruel y sin ningun sentido riba humandidad. Un atentado cu ta sacudi e fundeshi di libertad cu Franica ta asina orguyoso di dje. Aruba ta duna di e forma aki muestra di apoyo y convivencia na e pais Europeo aki , na esnan cu a perde un famia of ser keri y na mes momento ta rechasa den forma categorico atentadonan di e indole aki, unda semper bidanan inocente ta bay perdi. Laga nos hunto para fuerte y bisa no na terorismo na tur parti di mundo. Extremismo ta loke ta hibando mundo den e caos total aki. Ta nos mes y nos so, mustrando solidarismo y rechasando pensamentonan diabolico por para e racha di atentadonan sangriente cu un grupo sin consenshi ta causando na mundo.”