Hospital Horacio Oduber, tin un suma di Afl. 27 miyon pa cobra di Pais Aruba, pa servicio medico brinda na persona cu no ta legalmente residencia na Aruba. Pesey nan no ta sigura pa ley bao di AZV. E gastonan haci, pa tratado internacional, ta responsabilidad di gobernacion di e pais, pasobra ta e pais tin persona riba su teritorio cu no mester ta eynan mes; asina derecho internacional ta dicta y no ta laga espacio pa interpretacion diferente. Pero, si ta asina, pakico no ta simplemente paga e debe? Kico mas tin tras di e asunto aki?

E problema aki cu a surgi na Aruba no ta nada unico den e mundo aki, unda gran cantidad di persona indocumenta ta permanece na hopi pais. Y cu gobierno di cierto pais no ta tuma e mesun tratado internacional ey na serio no lo straña ningun hende tampoco. Pero, den e caso aki nos por limita nos mes na e caso actual na nos pais, pasobra nos mester por spera di nos gobierno cu e ta actua na un manera responsable. Y e responsabilidad no ta termina si un cierto institucion nacional ta haci e trabao; no por supone cu nan mester absorbe e gastonan. E institucion (HOH) mester por haya debido pago pa esaki.

E asunto, treci dilanti pa un parlamentario opositor cu a haci varios pregunta tocante e situacion financiero di HOH, a puntra tambe con a para cu pago pa e suma menciona. Pakico gobierno no simplemente ta paga HOH cada aña e suma requeri, debidamente presupuesta segun un pronostico debido y pago posterior despues di e control financiero adecua di un auditor certifica? Nos nunca a mira e gastonan aki presupuesta como tal, por ta talvez oculta di cierto manera no reconocible, esey nos no sa. Por ta anto cu gobierno ta warda pa wak te unda HOH ta absorbe e gastonan aki, dentro di e compensacion cu HOH ta ricibi di organo ehecutivo AZV, cu ta cubri en general gasto medico na Aruba? Por ta cu ta pensa segun e dicho di idioma Spaño: “El que no llora, no mama”? Si ta asina, anto nos a pasa e momento ey caba, pasobra e ‘baby’ HOH a yora…

Of un persona por pensa cu gobierno ta spera cu AZV ta paga e cuenta acumula, pasobra AZV ta paga tur cuenta medico, toch? No, pasobra AZV ta paga solamente gasto medico di persona legalmente inscribi na Aruba, segun nan propio ley. Pa expone e aspecto legal aki: e persona huridico AZV no ta responsable pa gasto medico cu ta core pa cuenta di e persona huridico Pais Aruba, e responsable segun tratado internacional, manera menciona. Ta di supone anto cu e caso no ta asina complica: Pais Aruba tin un debe cu HOH y mester cumpli cu e deber, como actor huridico responsble, di paga debe na tempo, manera ta exigi di cada ciudadano. Ademas, ta cuanto aña nos tin atendiendo e asunto di persona indocumenta cu ta presenta na Hospital den un emergencia medico? Den tur e añanan ey no por a regla e asunto aki na un manera debido? E hecho cu HOH ta trece e asunto na conocimento di prensa y publico ta indica cu e manera debido ey no ta existi ainda? Esey lo ta un berguenza, pasobra di tur manera e migrantenan aki mester haya tratamento, pa e simple hecho cu nos ta un pais cu mester actua legalmente corecto. Y ta bon cu HOH ta actua asina, loke den pasado no semper tabata e caso; un miembro di nos redaccion hopi aña pasa tabata testigo ocular di negacion di atencion medico na HOH, pasobra e persona cu keho medico serio no por a presenta prueba di residencia legal.

Pero e asunto aki ta trece nos tambe riba e tema mas general di e aumento di gasto medico cu e registracion masal di persona stranhero, a base di e amnistia den proceso actualmente. Esaki lo tin consecuencia tambe pa HOH, a pesar cu tabatin un factura anual caba pa servicio duna na persona indocumenta? Sigur, segun nos impresion. E motibo ta cu un persona indocumenta ta evita mas tanto posible busca ayudo medico, y sigur na tempo. Esey ta cambia ora nan ta residente oficial, nan ta haya un docter di cas y un botica designa y lo busca tratamento medico mas regularmente. Y sigur si nos tin miles di hende den situacion di ilegalidad pa hopi aña, e consecuencianan financiero di enfermedad no trata na tempo por ta bastante mas halto. Como cu e fluho grandi di migrante no ta aparece ainda den e datonan di residencia te cu december 2025, anto 2026 lo ta e promer aña di registracion masal di migrante. Segun informacion cu BDA a recopila, por conta por lo menos cu 6.000 persona stranhero registra pa fin di 2026, a base di permiso di residencia, pa via di empleo. Esaki ta sin conta otro miembro di famia cu eventualmente tambe ta haya residencia. E 6.000 personanan aki, segun e average actual di AZV di Afl.4.500 di gasto pa persona registra, ya ta yega na e suma di Afl. 27 miyon cu Pais Aruba debe HOH.

Pero, pasa e grupo grandi di migrante legaliza, pa encargo di AZV, no ta caba cu e problema di migrante ilegal. E fluho di migrante ilegal ta keda existi, y manera nos ta keda enfatiza: e mayoria no ta drenta via costa,riscando nan bida. Nan ta bin di turista y no ta sali mas… Y gobierno ta keda keto…