Ayera tardi Gobierno di Aruba a publica e noticia cu pa loke ta trata e tema di matrimonio di mesun sexo, nan a tuma e decision di bay casacion. Segun e publicacion ta indica, gobierno tuma e decision di bay den casacion contra e punto cu Corte a sinta riba stoel di gobierno.
Dia 6 di december ultimo Corte a aproba matrimonio pa parehanan di mesun sexo. Tabata trata di un caso cu Fundacion Orguyo y un pareha di dos hende muhe a entama contra pais Aruba. Fundacion Orguyo pa algun tempo caba ta vocifera nan lucha pa igualdad completo pa e comunidad LGBTIQ+.
Corte a conclui cu exclusion di matrimonio pa parehanan di mesun sexo ta bay contra di e prohibicion di discriminacion y pa e motibo aki ta declara cu ta conforme derecho cu disposicionnan di legislacion di Aruba lo no ta aplicabel, no por exclui matrimonio di parehanan di mesun sexo.
Den e publicacion Gobierno a indica cu despues di a ricibi e veredicto aki a busca conseho prome cu dicidi di apela y den e consehonan aki ta recomenda pa apela e punto cu corte a sinta riba stoel di Gobierno. Pa loke ta trata e punto cu si exclui parehanan di mesun sexo di matrimonio ta discriminacion, e gobierno a ricibi e conseho pa no apela, pasobra e constitucion di Aruba no ta permiti e tipo di discriminacion aki, ni ningun otro discriminacion.
A base di e consehonan aki Gobierno di Aruba a tuma e decision pa bay den casacion contra e punto cu corte a bay sinta riba e stoel di gobierno. Gobierno di Aruba ta haya ta importante pa haya claridad si e forma con corte a duna contenido na e “rechtsvormende taak” (tarea legal), ta corecto.
Por ultimo nan a remarca cu e no tabata un decision facil. E cambio di ley pa permiti matrimonio pa parehanan di mesun sexo, ta den un proceso di legislacion avansa den Parlamento di Aruba, cu e ley di iniciativa di partidonan Accion 21, Raiz, Mas y e tratamento di e ley ta den man di Parlamento.
Mester agrega cu Secretario di Estado pa Relacionnan di Reino y Digitalisacion, Alexandra van Huffelen, a manda un advertencia pa Aruba, y Corsou, cu e rechaso pa permiti matrimonio pa parehanan di mesun sexo por trece e islanan den conflicto cu Reino Hulandes.
Segun e Secretario di Estado, e paisnan mester por lo menos ofrece un alternativa pa parehanan di mesun sexo, segun CuraçaoChronicle a reporta. E union civil por ta un alternativa y esaki ya ta posible na Aruba.
