Hefe di ekipo di negociacion di banda di gobierno di Colombia na dialogo di paz cu Ehercito di Liberacion Nacional (ELN), Juan Camilo Restrepo, a bisa cu tur dos partido lo reinicia e conversacion pa 16 mei proximo.
“Ecuador ta un pais generoso como anfitrion pa conversacion di paz entre gobierno di Colombia y ELN, cu lo cuminsa 16 di mei proximo”, un funcionario halto colombiano a skirbi riba Twitter.
Dia 28 di april cu a pasa, gobierno a bisa cu nan lo aplasa e di dos rond di conversacion di paz cu ELN, pa dia 10 di mei, pasobra tur miembro di gueriya lo biaha pa Cuba pa reuni cu vocero di FARC.
“E delegacion di gobierno na dialogo cu ELN a informa cu via oficina di Alto comisionado di paz, a autorisa pa un reunion entre miembro di comando central di ELN y secretario di Forsa arma revolucionario (FARC) na La Habana”, nan a informa den un comunicado.
E confirmacion di un fecha nobo ta relaciona cu e bishita di presidente di Ecuador, Lenin Moreno pa Bogota – Colombia, dialuna entrante, cu obhetivo di dialoga cu presidente di Colombia, Juan Manuel Santos. “Presidente electo Lenin Moreno lo continua cu apoyo na e dialogo y asina busca paz na Colombia, manera Rafael Correa tabata haci”, Juan Camilo Restrepo a agrega. Restrepo a bisa cu e “bishita di Moreno ta confirma e relacion cu ta existi entre e dos paisnan aki”.
Lenin Moreno lo asumi e presidencia di Ecuador dia 24 di mei proximo, ora cu Rafael Correa, presidente actual y compañero di Moreno den e movimento oficialista Alianza Pais (AP, izquierda) bandona poder despues di 10 aña. Moreno, a vence den di dos buelta di eleccion presidencial riba dia 2 di april e otro candidato di partido Creando Oportunidades (CREO, centroderecha), Guillermo Lasso.
E gobierno di Colombia y ELN a habri un proceso di dialogo desde dia 7 di februari na Quito, cu obhetivo di finalisa e enfrentamento cu ta existi na Colombia pa mas di 52 aña.
