Venezuela: un politico cu ni Chavista ni oposicion ta stima

Un militar cu tabata traha como hefe di servicio secreto pa gobierno di Hugo Chavez awor ta gana espacio den politica di Venezuela, caminda oposicion no ta confi’e y grupo di oficialismo ta sinti desprecio p’e .

Awor e ta recore henter pais y ta purbando un posibel participacion den eleccion como un candidato pa presidencia. Miguel Rodriguez Torres, cu tin poco posibilidad di bira un di tres opcion, cu por soluciona violencia y problema economico cu Venezuela ta bibando.

Torres ta cana cu e odio di banda di grupo di oposicion, pasobra el a dirigi e represion di protesta antigubernamental na 2014. Tambe e ta genera poco aprecio entre hende di oficialismo, pa motibo di su critica riba tur programa social cu e gobierno bolivariano ta desaroya.

Pero te na e momento aki ta parce cu Torres ta haya popularidad entre Venezolano cu a bira lomba pa gobierno, cu no a soluciona e crisis economico, y pa Venezolano cu tambe a perde nan confianza den hende di oposicion.

Rodriguez Torres, di 53 aña, a critica Maduro pa e destruccion di e sistema economico na Venezuela, pa no detene e violencia cu ta bin di banda di milicia cu ta apoya gobierno y pa purba di silencia nan enemigo. Torres ta bisa cu e ta sinti preocupacion pa e marcha cu hende enemigo di presidente Maduro ta organisa y cu e tin un mensahe di reconciliacion basa riba su fe cristiano y evangelico.

“Na Venezuela ta existi un discurso di miedo di banda di oposicion y oficialismo cu ta daña e pais,” Rodriguez Torres a declara. “Nos no por sigui pensa cu nos mes ta enemigo, mester pensa riba nos pais prome”.

Empresanan di encuesta no ta inclui e nomber di Torres den nan consulta, pero nan critica riba Maduro no a ser lubida. Halto funcionario di gobierno ta acusa Torres di traicion of di participa hunto cu oposicion durante ultimo dianan. Su amigo ta bisa cu prensa di Venezuela ta haya presion, pa no haci ningun entrevista cu Torres, pero riba rednan social tur hende por lesa cu Torres por keda deteni pa critica constantemente gobierno di Maduro, manera otro militarnan a experiencia na Venezuela.