E sistema di brinda prestamo di ayudo mara na condicionnan, ademas di e control di CAft, ta un mitigacion di riesgo pa e cantidad di miyon euro cu ta biniendo Aruba. Gobierno Hulandes a institui un cantidad di paso pa limita e riesgo cu e fondonan aki ta cumpli cu nan meta.

Asina a informa Parlamento Hulandes den un carta amplio.

Hulanda a bay de acuerdo pa sigui yuda Aruba. Pero, Gobierno Hulandes mester sigura Parlamento di Hulanda, esta Tweede Kamer, cu pa e sosten di likides continuo, ta tene cuenta cu riesgonan grandi y pa tal motibo mes, Aruba mester sigui e condicionnan stipula, no solamente pa CAft pero tambe e landenpakket.

Problema di Aruba ta pre COVID-19

Den e carta pa Parlamento di Hulanda, Gobierno di Hulanda ta ilustra e problema di Aruba, di Reino y su papel den tur esaki, y e problema cu ta e base pa e proposicion ta cu pa hopi tempo caba, e resiliencia economico-financiero di Aruba ta hopi deficiente. E pandemia di COVID-19 no a crea e crisis financiero aki, sino cu a haci’e pio. Consecuentemente Aruba basa riba articulo 36 di Statuut di Reino Hulandes a haci un peticion riba e solidaridad denter di Reino y a pidi Hulanda pa ayudo.

Ayudo te cu awor

Y for di e punto di bista di solidaridad aki, Hulanda a sostene Aruba mas tanto posibel como partner den Reino. Y dia 9 di April 2020, basa riba conseho di CAft, a dicidi pa duna Aruba un prestamo na 0 porciento di interes pa un periodo di dos aña, pa un total di 21.4 miyon euro y despues na Mei, pa 24.7 miyon euro. Tabata na Mei tambe cu a mara e prestamo na condicionnan pa un di tres tranche.

E medidanan ta dirigi na reformanan structural dirigi riba fortifica resiliencia financiero, economico, social y institucional. Aruba mester haya e capacidad pa wanta sla na forma independiente despues di shocknan externo.

E di tres tranche di ayudo, 104.5 miyon euro a haya aprobacion di Conseho di Minister di Reino cu a instrui Secretario di Estado di Reino pa finalisa e negociacionnan cu Aruba y firma e areglo di e landspakket pa Aruba.

Voorschot

E di cuater tranche di sosten di likides ta dirigi riba e necesidad di fondo cu Aruba mester pa e prome kwartaal di 2021. Dia 18 di November ultimo, Conseho di Minister a dicidi pa extende un anticipo riba e di cuater sosten di likides. E anticipoo (voorschot) ta pa cubri e necesidad di likides di Aruba pa e prome seis simannan di e prome kwartaal di 2021. E voorschot lo keda estableci despues den e necesidad di likides cu ainda mester keda determina pa e prome tres lunanan di 2021.

E motibo cu a duna e voorschot aki tabata e hecho cu Aruba tin un necesidad agudo di likides comienso di Januari 2021. Pues no por warda te na e deadline pa e realisacion di e condicionnan pa e di tres tranche. E di dos parti di e sosten pa e prome 3 lunanan di 2021 lo ta igual cu e henter e suma determina pa e kwartaal menos e voorschot. E di dos parti di e pago lo keda manda pa Aruba ora cu CAft determina cua ta e necesidad di likides, y si Aruba a cumpli cu tur e condicionnan pa e di tres tranche y cu Conseho di Minister di Reino ta acepta esaki y ta tuma un decision positivo.

Responsabilidad di Gobierno di Hulanda

Segun e carta di Gobierno Hulandes na Parlamento di Hulanda, a tuma e decision pa brinda sosten ta basa riba e mesun Statuut di Reino, esta articulo 36, unda ta bisa cu paisnan denter di Reino mester yuda otro mas tanto posibel.

Pero Hulanda ta prepara si pa evita mas riesgo cu e sosten aki. E proposicion di e areglo di riesgo ta pa compensa riesgonan cu mercado no por cubri. Pa Aruba por cubri su mesun necesidad e ta nifica cu e pais ta presta riba mercado di capital. Aruba lo ta confronta cu interes halto riba mercado di capital internacional pa motibo entre otro di e situacion actual di finanzas publico. Si mester atrae e tipo di prestamonan caro asina, e tin un efecto negativo riba e sostenibilidad di debe pa motibo di e gastonan halto di interes. Te ainda, e Landsverordening Aruba tijdelijk financieel toezicht, LAft y articulo 29 di Statuut ta forma e cuadro pa haci prestamonan.

Alternativanan pa mitiga riesgo

E miho instrumento unda por percura cu por logra un adelanto den eficiencia optimal ta si haci un comparacion cu otro instrumento di maneho alternativo. Uno maneho di instrumento di maneho alternativo ta por ehempel, e dunamento di e fondonan como regalo en bes di un prestamo. Sinembargo esaki no ta hustifica mirando e hecho cu Gobierno di Aruba tin su propio responsabilidad pa carga economia di Aruba. Un otro alternativa ta e dunamento di prestamo sin reformanan mara como condicion. Si a presta sin condicion, lo no aumenta e capacidad di crecemento ni tambe e resiliencia y sostenibilidad di finanzas publico. Un otro ta un prestamo cu interes. Conseho di Minister di Reino a scoge a base di e presion presupuestario riba Aruba, pa no impone interes, tambe pasobra Hulanda por atrae e medionan contra un interes negativo.

Tambe a busca forma pa compensa e riesgonan nobo for di otro areglonan. Pero Gobierno di Hulanda ta bisa cu no tin ningun otro areglo di mitiga e riesgonan. No tabatin e oportunidad mes pa busca esakinan mirando e urgencia pa e ayudo. Aki dos aña lo studia e posibilidad pa refinancia e prestamo. Pero dor cu ta extende e tranchenan di likides, e ta nifica cu implicitamente ta reduci e riesgo cu Aruba no ta paga e otro debenan.

Riesgo y maneho di riesgo 2021

E riesgonan di e areglo pa Reino pa 2021 ta e 35.5 miyon euro cu ta bin como adelanto di Hulanda pa Aruba. E prome parti di e pago, manera a bisa caba, ta bin awor pa e prome simannan di 2021, te cu 12 di Februari. Aunke cu den e cifranan presenta na Parlamento di Hulanda ta den euro, e fondonan pa Aruba mes ta na Florin, cu ta crea un riesgo riba cambio, mirando cu e presupuesto tambe ta na euro.

Riesgo vs rendimento

Den e carta na Tweede Kamer, Gobierno Hulandes ta bisa cu Aruba tin un structura economico vulnerabel, cu ta motibo pakico no a mira crecemento a pesar di un economia mundial cu si a crece. Finanzas publico a bira hopi malo pa motibo di e combinacion e factor aki, hunto cu e maneho financiero economico debil. E crisis di COVID-19 a empeora e situacion pa Aruba. E quota di debe di Aruba tabata 84 porciento riba e Producto Bruto Nacional, GDP na 2019. Esaki a surpasa e limite critico di 55 porciento cu Fondo Monetario Internacional a stipula pa region di Caribe. Segun expectativa, e debe di Aruba lo subi te 118 porciento di GDP pa 2020, dos biaha e nivel critico segun IMF. E combinacion di sosten di likides mara na reduccion substancial di gastonan di personal di e sectornan publico y semi publico ta contribui na un finanzas publico sostenibel. Ademas, e sosten di likides ta cubri e medidanan pa mantene cuponan di trabou na Aruba y sigura cu tin entrada pa famianan. Concretamente ta wanta finanzas di Gobierno, pasobra si esaki mester collapse, e ta nifica un efecto sumamente negativo pa economia di Aruba. E gastonan di recuperacion lo ta mucho mas halto cu locual awor ta duna nan sosten di likides. Tambe ta reduci e riesgo cu Aruba no lo por paga su debenan internacional (default).

Na momento di otorga e sosten di likides, Gobierno di Hulanda a basa su mes riba consehonan di CAft. Hulanda ta consciente cu mirando e situacion di finanzas di Aruba, cu tin un riesgo cu e pais lo no paga (un parti di) e prestamo. Na April 2022 como tal lo evalua e solvabilidad di Aruba, na final di e periodo di e prestamo. Asina por evita cu ta bin un situacion unda e prestamo mester keda refinancia un of mas biaha of hasta pasa den un restructuracion.

Gobierno di Hulanda a tuma medidanan pa control y mitiga e riesgonan pa Reino Hulandes. Pa cuminza Aruba a bay de acuerdo cu e institucion di e organo di Reforma y Desaroyo, COHO, cu ta pa sostene y monitor e pais, sin cu ta tuma autoridad forma riba organonan di Aruba. COHO ta sostene Aruba den implementacion di e reformanan structural.

E reformanan aki tin como meta pa fortifica e resiliencia di e pais riba e terenonan financiero, economico, institucional y social. E obhetivo ta cu e reformanan aki lo yuda e situacion economico a largo plaso, cu ta reduci e riesgo cu Aruba no ta paga e debe aki bek na Hulanda. Consecuemente, aki dos aña lo revisa si por extende e prestamonan, posiblemente a cambio di otro condicionnan. Den e sentido ey ta posibel cu por extende e periodonan tambe cu e prestamonan, cu ta haya un otro trayectoria di tempo compara cu e prestamonan cu COHO lo duna. Na e momento ey lo mira con pa mitiga e riesgonan despues di COHO. Tur e evaluacionnan di riesgo lo ta den man di CAft cu ta e consehero di Gobierno di Reino.

Aruba no por paga interes pa awor

E sosten di likides ta bin sin cu Aruba mester paga interes. Y mirando cu Aruba no tin reserva presupuestario a scoge pa laga e prestamonan core te April 2022. E momento ey lo evalua a base di con y si mester refinancia, eventualmente cu un reserva presupuestario cu ta forma parti di dje. E ta nifica tambe cu durante e periodo aki Aruba lo no mester paga e debe te na April 2022. Pero CAft a conseha caba pa refinancia e prestamo aki y cambi’e den un asina yama ‘sinking bond.’ Esaki ta un bono cu ta rekeri cu e emisor ta reserva un cantidad di balor pa paga e debitornan. Den otro palabra, e ta un bono cu ta rekeri cu Aruba ta crea un fondo di amortisacion (afschrijving) cu e ora ta usa como garantia den caso cu e pais no por paga den futuro.

Di e forma aki lo por refinancia henter e sosten di likides cu Hulanda a duna, unda por bin cu condicionnan y periodonan di pago cu ta cuadra. CAft lo mester duna su conseho riba e proceso aki.

COHO y CAft

Segun Gobierno Hulandes, Aruba lo no por surpasa e crisis actual sin reforsa substancialmente e structura economico di Aruba. Esaki a keda anuncia caba na momento di a saca e di dos tranche di sosten, esta cu lo mester bin reforma structural riba henter economia cu ta necesario y ta condicion pa e ayudo. Hulanda lo yuda Aruba cu esaki. E obhetivo di e ehercicio aki ta pa economia di Aruba ta suficiente fuerte pa 2027 cu e por carga autonomia di Aruba.

E sosten di likides ta otorga pa Ministerio di Finanzas di Hulanda bou instruccion di Ministerio pa Asuntonan Interior y di Reino. E gastonan di e prestamo como tal ta limita y ta forma parti di e gastonan regular di e funcionamento di e instancianan.

Y finalmente, Gobierno Hulandes a bisa Tweede Kamer cu CAft lo keda cu su papel y responsabilidad, hasta cu creacion di COHO. E ta implica cu CAft lo keda informa Gobierno di Reino na tempo riba e situacion financiero di Aruba y cu ta sigui duna conseho riba e sosten di likides y si Aruba lo por paga esaki bek. Como tal, Gobierno di Hulanda ta sigura e organo legislativo di Hulanda cu a trata di tur forma pa mitiga e riesgonan y cu e areglo di riesgo aki tambe lo keda evalua despues di dos aña.