Porfin nos conoce e gabinete cu ta bay goberna Aruba e proximo cuatro aña. A anuncia anteriormente caba cu lo tin gobierno proximamente, sin e respectivo nombernan di ministro, pero awor esey tambe a bira conoci. Loke tambe tabata conoci y awor atrobe a anuncia ta e composocion peculiar y sin splicacion di e diferente carteranan. Y si acaso bin splicacion, esey no ta bay cambia e decision tuma cab y lo mester bay mira den e tempo nos dilanti ta con esaki ta bay funciona. No cu composicion di e ministerionan ta bisa tur cos, pasobra den pasado, cu un composicion menos misterioso, mal gobernacion di igual manera a bira parti di nos herencia colectivo. En todo caso, loke si hopi por ta di acuerdo cune ta cu oportunidad nobo ta pa haci un intento pa bay dilanti, y esey den e caso aki ta parce un posibilidad mas remoto cu nunca.

Ta dificil tambe pa distingui un cierto linea di maneho den loke nos ta mira den e composicion di e ministerionan, cu de cierto caso ta parce mas ‘misterio’ pasobra tin tanto caso di agrupacion di cartera den un ministerio cu no tin un relacion ‘natural’ cu otro, mientras den otro caso ta pone cierto cartera hunto cu hustamente ta mihor cu nan ta den man diferente, pa por tin mihor garantia cu e procesonan administrativo ta cana manera mester ta. Di otro banda ta kita cierto tareanan di e ministerio na cual pa cierto logica nan ta pertenece y ta duna esaki na otro ministro sin cu ta mira e logica su tras. Ehemplo di esaki ta e asignacion di tanto Labor como Dimas na e anterior ministro di Labor y Asunto Social. Nos por imagina cu a haci esaki pa pone henter e proceso di peticion y otorgamento di permiso di estadia relaciona cu trabao den un man ministerial. Nos no a tende e hustificacion ainda, pero en principio esaki ta parce un hopi mal idea. Pa cuminza no ta trata solamente di permiso di estadia relaciona cu trabao, sino cu Dimas ta atende tur peticion di permiso, tambe esunnan cu no ta relaciona cu trabao. Esaki ta haci cu un tarea cu pa su caracter ta pertenece na ministerio di Husticia, awor ta bay cay bao di otro ministerio. Y no bin cu e argumento cu den pasado Dimas tabata den man di otro ministro tambe, pasobra esey tabata un ‘one time thing’ unda Hulanda a pone e ministro di Husticia un banda.

Y tin algo mas. Ta hustamente e ministerio aki cu ta opera manera un negoshi di famia, e caso mas grave di nepotismo den e actual gobierno, cu awor ta parce di haya un recompensa pa e maneho repudiable aki, apoderando di henter e trayecto di decision di tur stranhero cu ta drenta nos pais. Nos ta casi custumbra caba cu e hecho di nepotismo aki, mientras te awe nos no ta haya un respuesta drechi di nos Promer Ministro, posiblemente pasobra ta trata di su propio famia. Laga cu tabata otro famia ta haci esaki anto sigur e lo a tuma accion pa gana punto den e competencia di ken ta mas integro y trasparente. Ta incomprensible con ta yega na e tipo di decision aki, unda ta parce cu principio di bon gobernacion, entre otro e principio di limita riesgo di poder absoluto den cierto caso delicado, dividiendo poder di decision entre diferente ministerio, den e asunto clave aki pa gobernacion, no ta di importancia algun.

No mester lubida tampoco cu ta trata di un asunto strategico tambe den e sentido cu pa varios decada e maneho hiba den permiso pa stranhero, y su tras e posibilidad di bira ciudadano Hulandes, ta defini composicion di nos poblacion. Loke nos a mira den e ultimo tres decada nos tras no ta muestra di maneho balanza y bon pensa, mas bien un maneho cu regularmente tabata dal su vueltanan straño, variando entre demasiado permisivo y demasiado estricto, cada un cu nan problema specifico. Casi nunca den mas di 30 aña tabatin un maneho cu tabata tuma na cuenta e necesidadnan di nos economia, causando problema innecesario pa e comunidad empresarial resultando den perdida economico sin mester. E maneho hiba desde entrada di e crisis di Covid te awe ta caracteriza pa falta di accion contundente pa, di un banda protege e derechonan di mercado laboral local, pero tambe atende cu prioridad e necesidad di nos economia di trahador cu cierto conocimento specifico, cu di tur manera no tin persona capacita riba mercado local. Y si bien por ta cu finalmente e maneho cu e gabinete aki ta bay hiba, den e asuntonan importante aki, talvez no ta resulta pior cu e maneho anterior, sigur e no ta bay ta un mehoracion. Y gobierno cu ta inicia sin un perspectiva di mehoracion, muy probablemente no ta bay topa pa casualidad cu e maneho corecto na caminda tampoco. Y esaki ta decepcionante, pero no sorprendente, pa e simple motibo cu, di loke nos a mira den ultimo añanan y e promesanan vago haci den campaña, no a duna pa mas na promer lugar. Den e sentido aki nos lo depende anto di un milagro, y na Aruba nos no conoce milagro, pasobra tur cos ta posible, bon o malo, semper.

LEAVE A REPLY

Please enter your comment!
Please enter your name here