Desde juni 2015 ta wardando reunion cu minister encarga cu labor Paul Croes riba e situacion di cheap labor aki na Aruba. E fenomeno di cheap labor ta un Cancer na Aruba. Segun Diego de Cuba presidente di Sindicato STA, ainda no a logra reuni cu e minister pa trata e preocupacion grandi cu tin pa e desaroyo aki riba Aruba.
Gobierno ta perdiendo hopi placa pa e motibo di e fenomeno aki. Na Aruba tin mas compania di construccion inscribi, cu tin hende inscribi trahando den construccion. Ta haya cu e companianan chikito aki ta lanta y ora cu tin un destaho cu nan tin cu bid, nan ta bid asina abou, cu e ta pone bo pensa con e hendenan por cumpli cu e proyecto, paga e hendenan y caba cu e proyecto. P’esey ta mira hopi biaha cu nan no ta caba cun’e. Prueba di esey tin manera Caya Grandi y Linear Park, pasobra e hendenan aki no tin e conocemento necesario di kico pa haci, nan ta busca trahado barata, paga nan coy kens. Y e mas tristo di e cos aki ta cu nan ta retene placa di e hendenan aki pa locual ta AOV, AZZ, AWW e impuesto nan cu tin, pero nan no ta pasa esey pa gobierno, cual ta causa cu gobierno ta perde di gana anualmente (calculacion bruto 40 miyon). “E situacion ta bira pio cada dia”
“Ora cu nan a elimina e scolnan John F. Kennedy y otro na Tarabana, scolnan dirigi na duna enseñansa di Carpinte, Metsla, Electricien, Welder entre otro, cual awo no tin mas, cual ta haci cu hendenan ta bin di afo. Na Venezuela e salario minimo ta 15 dollar pa luna, nan ta bin Aruba traha pa 10 dollar pa dia. Si compara companianan grandi na Aruba manera Albo Thiel, Wegenbouw, si nan mester coy nan salario pa ora, e ta yega facil na 25 florin pa ora. Mayoria di e trahadonan di e companianan “pirata” ta stranhero y hopi ilegal, nan ta wordo paga 8 of 9 florin pa ora. P’esey nan por haci bid abou pa trabounan.”
Caso recien Albo
Segun Sr. De Cuba, 15 empleado di Albo a ricibi carta. A tene reunion cu caracter di urgencia cu gerencia di Albo anto nan a splica nos cu e proyectonan ta cabando (hospital tambe ta cabando). Esaki kiermen cu nan no ta resta hopi trabou mas pa haci. E dolor di mas grandi cu nan ta sinta cun’e ta cu e cheap labor cu tin na Aruba ta keda forma un obstaculo pa e companianan aki. Pasobra ora cu e companianan aki ta pagando 25 florin pa ora, y coy tur e gastonan social pone riba dje, tin otro companianan cu ta pagando nan empleadonan 7-8 florin pa ora, cual ta haci cu e ora bo no por competi. Pues e cheap labor tin e companianan grandi manca. Locual cu Albo a bin cun’e ta un retiro boluntario. E paketenan cu nan a ofrece ta esunnan cu kier acepta ta acepta, e no ta obligatorio pues abo por wak si e ta cumbini bo e ora bo ta tume. E carta ta bisa tambe cu ningun hende ta obliga di firma. Pues informacion treci dilanti siman pasa cu ta indica cu 80% di hende lo a haya carta pa bay cas, no ta corecto ta 15 empleado ta papiando di dje. Pues ta spera cu por yega na un areglo beneficioso pa esunnan cu dicidi cu nan kier bay, Sr. De Cuba a bisa.
Gobierno ta promove cheap labor
Segun Sr. De Cuba ta splica e fenomeno aki a bay ta desaroya su mes desde cu nos a haya nos Status Aparte. Esaki ta un problema hopi serio cu Aruba ta confrontando unda cu ta haya hende cu ta bin di exterior, particularmente for di Venezuela, Colombia y Peru cu ta traha pa kico cu ta, contal cu nan keda Aruba. E prijs riba mercado a wordo daña asina malamente, cu companianan manera Albo y Wegenbouw ta condena pa muri, pasobra nan mester bid halto, sino nan no por cumpli ni cu salarionan, corda cu e proyecto. P’esey nan no ta hayando casi niun proyecto mas. Gobierno conscientemente ta promoviendo cheap labor, pasobra nan ta duna e companianan aki e proyectonan tambe. Aworaki Sr. De Cuba ta expresa cu e ta teme pa e caminda cu nan ta construyendo actualmente, “green corridor”, cu un tin nada di green na dje, cual ainda falta pa rosa.
Control
Departamento di labor ta responsabel pero nan no tin suficiente personal pa haci esaki, ta aña pasa a haci protesta contra e cos aki, y e dia siguiente diferente departamento den comunicacion cu polis a haci un entrada na RIU unda cu nan gara 300 hende ilegal. Despues di esaki no a tende nada mas, pues e fiesta ta sigui. “Pa motibo cu e hendenan aki ta ilegal, ta paga nan barata y nan no por reclama na niun hende., si nan por manda 100 dollar pa nan hendenan afo, nan hendenan a haya un bida.
Refineria cherry riba e bolo
“E habrimento di e refineria lo bira e cherry riba e bolo pasobra, ta bay habri e refineria y niun hende no sa kico e contract di 2000 pagina ta encera. Parlamento ta yorando pe y nan no ta lag’e los. Kico tin scondi aden, cu bo no kier pueblo haya sa kico bo a firma. Y e mas tristo ta cu e cheap labor aki ta bay hinca nos den un cataclismo masha grandi cu tin un “snow ball effect,” Sr. De Cuba a termina bisando.
