1jul, NW, edmundo marling (3).JPG

Ayera mainta durante e welga cu algun trahado di IBiSA tabata tin, e sindicatonan SEPPA y TOPA a wordo pidi pa ta eynan. Sr. Edmundo Marlin vice presidente di Sindicato di Empleadonan Publico y Priva di Aruba (SEPPA) a indica cu e welga cu e trahadonan di IBiSA ta pa motibo cu nan no ta di acuerdo cu e procedura cu gobierno tin pa loke ta e reorganisacion di IBiSA.

 

Segun Sr. Marlin, loke cu a sosode, desde principio nan tin hopi problema cu e proceduranan pa loke ta e reorganisacion di IBiSA. Antayera dos trahado di IBiSA a gana nan caso den obhecion, pero minister a dicidi di rechasa esaki pa hendenan cu no tin funcion den IBiSA. E dos persona aki tin cu bay Recurso Humano pa mira si tin un otro funcion cu gobierno por pone nan.

 

Rumor cu lo bin cu hende di afo

“Esaki nos ta haya lamentablemente malo pa motibo cu bo ta papia di un reorganisacion. E mesun gobierno aki, for di tempo di minister Visser, a duna bon cla di conoce cu tur derecho di trahadonan lo wordo atendi debidamente,” el a bisa Bon Dia Aruba. E ta puntra con ta posibel awo cu ta reorganisa y e funcion ta habri. Pero aparentemente tin rumornan cu hendenan di afo ta bay yena e funcionnan aki, mientrastanto tin hende den cas cu ta haciendo parcialmente of ta haciendo e trabou. Sindicato SEPPA no ta bay tras di rumornan, sino nan ta bay tras di echonan, segun e sindicalista.

 

Trahadonan ta indigna

E hendenan aki a bay den e procedura di obhecion. Comision di obhecion a duna nan rason riba esakinan, pero awo a bin cambio. Esaki a indigna e trahadonan hopi mas, pasobra nan no ta di acuerdo cu e forma aki. Trahadonan a bisa cu esaki ta basta caba, pasobra hopi cos ta pasando banda di esey na IBiSA. Trahadonan no ta contento cu esey. Pa tal motibo nan a sali pafo pa protesta y mustra nan malcontento na e comunidad con doño di trabou ta tratando nan como trahado di IBiSA.

 

Tin hende capacita

E dos funcion cu lo wordo yena cu hende di afo ta hefe di sosten general y hefe di comunicacion. Den IBiSA mes tin hende capacita pa traha na e dos funcion aki, pero asina mes kier trece hende pafo di gobierno pa traha.

Pero e sindicato y trahadonan di IBiSA lo haya sa mas pa cu e situacion aki entrante awe. Loke sindicato SEPPA a compronde cu entrante awe e personanan aki mester presenta na pia di trabou. Esey ta e rumornan cu e sindicato ta scuchando. “Seppa semper ta bisa cu nos no ta bay tras di rumornan. Pero semper nan ta bisa caminda cu tin huma tin candela. Nos ta bay wak kico lo bay pasa,” Sr. Marlin a bisa.

 

Dos trahado a haya carta

Segun Sr. Marlin, mayoria personal di IBiSA no ta di acuerdo cu e proceso cu a wordo hiba pa gobierno. Diesun trahado a pasa den e proceso, di cual dos a gana nan caso den Comision di Keho, pero awo nan haya un carta. E trahadonan a indica cu prome ta e dos trahado aki a haya carta y awo ken lo ta siguiente. E caminda cu e dos persona aki lo tuma ta bay corte. “No tin niun motibo pa sinta cu minister pasobra el a tuma su decision riba papel caba. Awo abo tin cu bay corte pa asina hues bisa si bo tin rason of no,” el a indica.