‘Gobierno ta gastando placa na Hulanda pa fiesta y nombramento’

Melvin Tromp (AVP)

E prome medida contra pueblo ta pasa sin aviso of splicacion preliminar ya cu e anuncio di e bon noticia cu prijs di gasolin lo a baha cu 3 cen, realmente a bin nifica un reduccion di solamente 1 cen, ya cu gobierno Oduber-Wever-Croes, a dicidi di pasa bay cu 2 cen riba cada liter reduci. E reduccion aki a tuma luga a base di un medida cu gobierno di MEP a introduci na 2007 pero cu no a wordo implementa pero awor cu MEP den gobierno, ata e regalo cu semper e partido aki tabatin pa pueblo, esta pakete di medida, Melvin Tromp di AVP ta mustra.

“Mientras cu gabinete Oduber-Wever-Croes ainda no a presenta un programa pa su maneho financiero y economico y mucho menos un programa di gobernacion na parlamento, ya caba por mira un serie di desaroyonan tumando luga, caminda practicamente ta beneficiando tur hende yega na e partidonan den gobierno, na amigo y famianan y tambe na sponsornan cu a hinca placa den campaña electoral. Mientras cu prome minister y minister di financia ta papiando di un KB cu ta na caminda, nos por a tuma nota di un delegacion grandi cu a bay Hulanda pa celebra Arubadag, entre cual un grupo musical cu a bay cu gasta paga, hasta pa nan casa. Otro representantenan di gobierno cu tambe a bay celebra riba costo di gobierno loke ta lanta duda riba seriedad di e gobierno aki pa loke ta gastonan cu tur dia e ta keha di nan.

Esaki ta pone nos pensa riba un rapport cu e actual prome minister y lider di MEP a yega di traha hunto cu e actual minister di Financia, cual rapport nan a bay trata di parti Hulanda, cu e titulo di: ‘Feestvierend ten ondergaan.”

No solamente celebracion grandi di Arubadag ta lanta pregunta y duda pero tambe e hecho cu desaroyonan cu ta tumando luga na Arubahuis caminda placa lo no ta un problema.

Entre otro minister plenipotenciario tin un secretaria directo den servicio, director lo tin su propio secretaria tambe den servicio y ta bin acerca cu e representante di Aruba na Brussel, tambe tin un secretaria personal awo den servicio. Tur esaki ta pone cu gobierno di coalicion ta gastando tres biaha mas cu loke gobierno di AVP a gasta cu maneho di Arubahuis y otro asuntonan na Hulanda y den e proceso aki no ta scucha ningun hende papia di mega debe.

Awor cu celebracion a caba, gobierno lo bin trece cuenta pa pueblo paga ya cu esey ta un tradicion di partido MEP caminda no tin mucho pa pueblo, pero pa amigo y famianan tin gran cantidad di beneficio y tur cos ta mustra cu e edificio di gobierno cu ta wordo drecha na e momentonan aki, lo crea espacio pa emplea mas hende den servicio di gobierno”, miembro di partido AVP, Melvin Tromp ta mustra.

You May Also Like

‘Anuncio recien di Citgo ta lamentabel y fuera di nos control’

Den cuadro cu e noticia recien di e ‘slow down’ di Citgo, parlamentario di ...

RED: ‘Santo Largo, su saliña y becindario ta un hoya di naturalesa’

  Savaneta ta caminda mi a lanta desde baby y caminda mi recuerdonan di ...

Danki na eleccion deporte tin atencion

Ultimo simannan nos por a tuma nota con tin interes a aumenta un biaha ...

‘AVP mester stop cu politica di poco nivel tocante retiro di e coordinadornan

Ta increibel con nos ex Prome Minister y henter su pandiya ta tratando di ...

Tur mucha na Aruba merece oportunidad igual pa ricibi educacion di calidad halto

Diasabra mainta na Hilton Aruba Caribbean Resort & Casino a tuma luga e “Teachers ...