Gobierno di Aruba a condena Citgo su decision pa nenga parlamentarionan Hulandes drenta e refineria na San Nicolas.
Manera conoci e parlamentarionan Hulandes Ronald van Raak (SP) y tambe André Bosman(VVD) kier a regla un bishita durante e encuentro na Aruba di parlamentarionan di Reino (IPKO). E delegacion parlamentario Hulandes a pidi asistencia di parlamento di Aruba pa regla un bishita na e refineria of presentacion di Citgo, cual ta e compania encarga cu e maneho di dicho refineria.
“Lamentablemente Citgo a nenga di haci esaki, y e dos parlamentarionan a bay busca informacion nan mes. Nan a bay na e refineria y locual nan a mira a decepciona nan. Nan a mira hopi hero bieu, y nan no a mira practicamente ningun actividad”, e comunicado oficial di gobierno ta bisa. E comunicado ta sigui splica cu riba medionan social nan a cuestiona esaki masha hopi mes y un video di sr. van Raak ‘locual mi no tabata mag di wak na Aruba’ a circula den henter Reino.
Prome minister di Aruba Evelyn Wever-Croes a duna su reaccion awor, indicando cu e ta ‘lamenta e echo cu Citgo no a duna e parlamentarionan Hulandes informacion di e proyecto aki’. “Pa gobierno tambe aparentemente ta dificil pa haya informacion.”
Tin reunionnan planea e siman cu ta bin pa haya mas informacion di e status di e proyecto. Mes momento gobierno ta studiando e contractnan cu gobierno di AVP a cera cu Citgo pa operacion di e refineria, e comunicado ta bisa. “Pasobra indicacion ta cu e inversionnan no a tuma luga y no tin claridad ki tempo nan lo tuma luga.” Gobierno di Aruba a anuncia siman pasa caba cu a institui un comision independiente pa studia e contract y duna conseho di kico exactamente mester pasa of locual mester wordo haci.
