Den sentencia pronuncia ayera den e caso principal, Hues den Prome Instancia a haya cu e retiro di e Hunta di Supervision di Fundacion Lotto pa Deporte no por carga su aprobacion, igualmente e nombramento di un hunta nobo di escogencia di e mandatario concerni.

Riba e demanda di e fundacion pa condena e ministro na laga e Hunta di Supervision haci nan trabao trankil, Hues a dicidi cu no por honra esaki, pasobra e hecho ta cu, en principio e Ministro tin e facultad pa retira un miembro di e Hunta di Supervision ta haci cu e ministro por haci pregunta pa por husga si e hunta ta haciendo su trabao debidamente. Den e comunicacion aki ta logico cu ambos partido mester comporta nan mes di forma rasonabel, segun Hues.

E demanda principal di FLPD den e caso aki tabata pa declara e retiro di e Hunta di Supervision no valido, igualmente e nombramento di un Hunta di Supervision nobo. Hues a analisa ampliamente e motibonan duna pa e mandatario pa retira e miembronan Janga, de Sousa, Kamperveen, Faneyte y Kock. Argumento importante tabata di banda ministerial e consideracion cu FLPD ta un fundacion di gobierno y cu e Ministro tin e facultad estatutario pa nombra y retira miembro di e Hunta di Supervision.

Tambe cu a bin un gabinete nobo, cu mester por tin e autoridad pa nombra ‘su hendenan di confianza’. A argumenta cu na 2009 e gobierno nobo di e tempo ey tambe a haci esey, pidiendo e miembronan di e fundacion (y varios otro entidad liga na gobernacion; red.) pa nan pone nan posicion na disposicion di e gobierno nobo. A argumenta di banda di gobierno cu no por ignora e realidad di Aruba cu tin persona liga politicamente den funcionnan di confiansa. Tambe cu e cambio di gobierno ta trece cune un otro maneho, y cu esaki ta hustifica un substitucion di e miembronan di e Hunta di Supervision.

Ademas FLPD a permiti cu e tesorero Wernet cobra FLPD un suma di Afl. 188.450,- pa trabao haci pa FLPD, y cu tin un falta di transparencia unda, entre otro, no a entrega e cuentanan anual di 2013-2016 na e mandatario. Tambe cu varios miembro di e Hunta di Supervision tabatin otro funcion den otro entidadnan cu cual FLPD tabatin un relacion di trabao. Pa motibo di tur esaki un bon colaboracion entre e Ministro y e miembronan di e hunta no tabata posibel.

Minister por haci pregunta y retira miembro; no fiha maneho
Hues a opina cu ministro tin e facultad pa nombra y retira miembro di e Hunta di Supervision, pero cu e statutonan no ta otorga e mandatario autoridad pa determina maneho di e fundacion. Esaki ta tarea di e directiva, bao supervision di e Hunta di Supervision. Tampoco e mandatario tin facultad pa entremete den e asuntonan diario di e organismo. For di e facultad pa nombra miembro den e Hunta di Supervision por supone cu un ministro ta nombra hende cu ta bay trata na acopla e maneho di e fundacion na e politica di e ministro. Pero no por conclui automaticamente cu e miembronan cu ta den e hunta caba, supuestamente lo a perde e confiansa completo di e Ministro. E simpel echo cu tin otro gobierno cu ta desea otro maneho, riba su mes, no ta suficiente motibo pa cambia un Hunta di Supervision.

Hues ta indica tambe cu ta importante cu, tanto e persona legal (e fundacion) como esunnan cu pa ley o statuto ta vincula cu e organisacion, comporta nan mes manera por exigi di nan segun ta rasonabel.

Hues a elabora tambe riba e aspecto di decisionnan tuma na ultimo momento di un periodo di gobernacion, cu e meta pa pone e siguiente gobierno dilanti un ‘fait accompli’ pa loke ta recursonan gubernamental. Hues a bisa cu ta maneho fiho di e Corte Comun di e islanan cu tal acto por ser considera nulo pa motibo di ta atenta contra orden publico. Sin embargo, den e actual caso abogado di Pais Aruba no a apela nulidad di e cambio di statuto ni di e nombramento di e actual miembronan di e Hunta di Supervision, basa riba esaki.

Veredicto
Hues ta anula e retiro di e miembronan di Hunta di Supervision y ta anula tambe e nombramento di e hunta nobo, cual tabata un decision di 10 di januari 2018. Hues ta desaproba e peticion di FLPD pa gobierno keda condena na laga FLPD haci su trabao sin stroba nan.