Dialuna ultimo Minister di Finanzas, a reuni cu director Jeroen Nijland di Netherlands Foreign Investment Agency NFIA, e agencia cu ta busca inversionistanan pa Hulanda y ta guia inversionistanan Hulandes den exterior.
Segun e comunicado cu Bon Dia Aruba a ricibi, ta indica cu na februari 2018 e mandatario a reuni pa prome biaha cu Nijland kende a sugeri pa Aruba haci uzo di un facilitado pa asina hunto cu ‘stakeholders’ yega na un vision concreto pa diversificacion di economia di Aruba. E idea aki a concretisa na mei 2018 na unda cu e facilitado internacional Colm Riley hunto cu ‘stakeholders’ a yega na e 6 sectornan prometedor pa diversificacion di Aruba su economia.
Durante e reunion den presencia di ehecutivonan di Departamento Economico, Minister Ruiz-Maduro a haci entrega di e documento cu ta contene e Maneho Economico Fuerte y Resiliente pa Pais Aruba. Nijland a keda impresiona pa e trabou cu Gobierno di Aruba a haci pa por a trece hunto den un documento tur informacion di e maneho cu ta wordo prepara y hiba riba e diferente terenonan cu ta forma e maneho economico pa Aruba. Entre nan, e maneho empresarial, maneho pa exportacion, y e maneho pa crecemento sostenibel teniendo na cuenta e 17 metanan di sostenibilidad di Nacionnan Uni. E documento ta contene tambe e 6 sectornan prometedor pa diversifica nos economia, cual ta un resultado di e reunion fructifero hiba cu Nijland di NFIA.
E mandatario a gradici Nijland pa su bishita y colaboracion, y ta spera di por keda conta cu e sosten di NFIA pa asina por sigui cu e trabounan pa innova Aruba su propio agencia di inversion.
