Ministerio di Deporte, den colaboracion cu IBISA, CEDE Aruba, Fundacion Movemento ta Bida y Lotto pa Deporte, ta lansa un proyecto piloto nobo cu ta enfoca riba aumenta actividad fisico pa adultonan mayor na Aruba. E iniciativa, cu lo cuminsa dia 4 di mei, lo dura pa un periodo inicial di dos luna y despues lo ser evalua pa determina si por sigui y expande den futuro.
Will Erasmus di IBISA a splica cu e proyecto ta representa un esfuerso pa amplia e alcance di programanan comunitario existente, cu un enfoke special riba e grupo di adulto mayor. E meta principal ta pa crea mas actividad cu impacto directo den comunidad, promoviendo un estilo di bida activo y stimulando participacion social entre e poblacion mas grandi di edad. E intencion ta pa logra un efecto positivo y duradero den bienestar di e grupo aki.
E colaboracion ta reuni diferente organisacion cu tur tin un rol specifico. IBISA ta aporta instructornan cualifica pa guia e actividadnan y garantisa participacion seguro. CEDE Aruba ta pone e busnan di WAW Mobiel disponibel pa yega na diferente bario y centro di comunidad. Fundacion Movemento ta Bida ta facilita acceso na e gruponan di adultonan mayor a door di su red di organisacionnan di adulto mayor, mientras cu Lotto pa Deporte ta contribui cu apoyo financiero pa haci e proyecto posible.
E proyecto piloto ta basa riba e exito di e programa Weganan Ariba Wiel (WAW Mobiel), cu a ser introduci mas di dos aña pasa pa trece actividadnan deportivo y recreativo directamente na bario. Originalmente enfoca riba mucha y hoben, e programa a demostra cu e ta un manera efectivo pa haci deporte y movemento mas accesibel pa comunidad. Awor, cu e extencion aki, e concepto ta ser adapta pa satisface e necesidadnan di adultonan mayor.
Segun minister di Deporte, Gerlien Croes, e idea pa inclui adultonan mayor den e programa a nace for di dialogonan cu a tuma lugar aña pasa riba con pa sigui promove actividad fisico den tur grupo di edad. E exito recien di un olimpiada pa adultonan mayor a confirma cu tin un gran interes y necesidad pa e tipo di actividad aki, locual a duna impulso pa sigui desaroya un iniciativa specificamente pa e grupo aki.
El a splica cu den e marco di e proyecto piloto, un di e busnan di WAW Mobiel lo ser dedica exclusivamente pa adultonan mayor. E unidad mobiel lo sigui un schedule pa bishita diferente club, centro di bario y otro lugarnan unda e gruponan di adulto mayor ta reuni. Ademas, grupo informal di adultonan mayor cu kier participa tambe lo por haci peticion pa e bus bishita nan, sigurando un acceso amplio y inclusivo.
Participacion lo ser coordina via IBISA. Gruponan interesa por entrega un peticion indicando nan ubicacion y disponibilidad, pa asina integra nan den e schedule di e bus. Informacion riba e programa tambe lo ta disponibel riba e plataforma actividad.aw, facilitando comunicacion y acceso pa tur interesado.
CEDE Aruba a hunga un rol importante den fortalecemento di programanan comunitario den ultimo añanan. Daniel Tecklenborg, director di CEDE Aruba, a splica cu desde 2022, e organisacion ta traha pa amplia actividad den bario y pa haci servicio mas cercano na pueblo. Aunke tin progreso, a ser identifica cu no tur programa ta yega na tur hende. Esaki a conduci na creacion di WAW Mobiel na 2023, cu a logra alcansa diferente comunidad, specialmente esnan di FCCA.
Tacklenborg a indica cu e programa WAW Mobiel a beneficia di partnership fuerte y apoyo financiero, incluyendo contribucion di UNHCR pa adkiri un di dos vehiculo. Cu e capacidad adicional aki, a keda posible pa amplia e programa na mas bario, aumentando e cantidad di comunidad cu ta beneficia. Actualmente, tin plan pa amplia actividad pa mucha y hoben na ocho bario den oranan di atardi, mientras cu e piloto pa adultonan mayor lo ser integra den e uso di e busnan durante oranan di mainta.
Door di combina e proyecto piloto cu e structura existente di WAW Mobiel, organisadonan ta busca usa recursonan di forma mas eficiente. E busnan por opera na diferente ora di dia, sirbi diferente grupo di edad y maximisando impacto. E modelo aki ta refleha un strategia mas amplio pa crea programa inclusivo y flexible cu responde na necesidadnan di poblacion di Aruba.
Fundacion Movemento ta Bida su participacion ta ser considera esencial pa yega na e grupo meta. Door di su red di contacto cu organisacionnan di adulto mayor, e fundacion ta facilita acceso y participacion. Esaki ta importante pa sigura cu e actividadnan ta relevante y accesibel pa e persona cu mas tin necesidad di esaki.
E meta general di e iniciativa ta pa promove bienestar fisico, mental y social entre adultonan mayor. Mantene un estilo di bida activo ta ser considera clave pa mehora calidad di bida y salud general. E proyecto tambe ta busca fortalece comunidad door di crea oportunidadnan pa interaccion social y participacion activa.
Segun minister Croes ya caba tin interes inicial di diferente grupo pa participa, indicando cu tin demanda pa e tipo di actividad aki. E fase di evaluacion despues di e dos luna di e proyecto piloto lo ta decisivo pa determina con e programa por ser mehora y amplia.
Si e proyecto resulta exitoso, e por bira un modelo pa futuro iniciativa comunitario cu ta pone enfasis riba inclusividad y accesibilidad. Door di probecha partnership y programanan existente, e iniciativa ta representa un paso importante pa pone Aruba completo den movemento, cu un enfoke special riba adultonan mayor.
