Dialuna anochi a drenta e tristo noticia cu Grace M.C. Maduro a fayece. Grace, di 61 aña di edad, a hiba un bataya admirable durante algun aña contra cancer di pulmon, pero finalmente e enfermedad a impone.

Esey no a stroba Grace pa te na ultimo ta activo den e diferente actividadnan profesional y social cu e tabata haya importante. Su pasion y energia ora e ta lucha pa algo cu e ta kere aden, a inspira hopi den su cercania, aunke su caracter fuerte na su ocasion lo por a duna friccion. Pero esey ta semper cu hende cu ta duna tur cos ora nan ta emprende algo.

Grace a cuminza su carera profesional na gobierno, despues di gradua na Sociale Academie Markendael na Breda, den ramo di recurso humano y labor. El a join e team cu tabata dirigi e promer intentonan di mehora gobernacion den e asina yama Bureau Organisatie & Efficiency (BOE). Despues el a pasa pa ta manager di Recurso Humano pa hopi aña na Hospital (1994-2008). Un reto nobo a presenta den forma di un job cu KPMG, unda el a contribui na reorganisacion di ministerio di Salubridad Publico na Curaçao. El a continua den sector priva den e empresa Fantastic Gardens, hunto cu su actualmente ex-esposo Roy Maduro. Pa varios aña, te recientemente, e tabata representa Aruba den e Beheerraad di Corte Comun pa e Islanan, unda el a fungi como presidente y vice-presidente.

Recientemente el a tuma na su encargo pa contribui den coordinacion di e Plan di Crisis Social, como lider di proyecto, entre otro den introduccion di e ‘meldcode’ pa e sectornan concerni den prevencion di abuso di mucha.

Te practicamente ultimo dia el a keda participa y contribui na loke e tabata haya importante, entre nan Insight; Arubaanse Padvindsters Gilde; Muziekschool y e proyecto Leerorkest; Stichting Wit-Gele Kruis, Stichting Basisschool de Schakel, Stichting Bevolkingsonderzoek Borstkanker. Sigur e proyecto Leerorkest a lanta un entusiasmo y pasion cerca Grace, pasobra e tabata convenci cu nos mester busca prevencion pa nos muchanan den cos positivo, di cual musica ta un di esunnan mas importante.

Grace ta bin di un famia di 11 ruman, entre nan nos ex-miembro di Raad van State y ex-presidente di Conseho Electoral mr. ing. Hubert Maduro. Tambe e ta ruman di nos hefe di redaccion Leo Maduro. E ta laga atras su dos yiunan, Ricky y Rebecca. Na nan tur, di parti di redaccion di Bon Dia Aruba y di Caribbean Speed Printing, un palabra di condolencia y hopi forza den e dianan aki. Cu Grace sosega na paz.

 

LEAVE A REPLY

Please enter your comment!
Please enter your name here