Directora di Aruba Tourism Authority (ATA), Ronella Tjin Asjoe-Croes a bisa cu teniendo cuenta cu cifranan di nos turismo, te aworaki Aruba compara cu aña 2019 ,tin un caida di 68%, esaki despues di reapertura di nos frontera na juli.

Esaki ta den margen di loke ATA a proyecta pa 2020, caminda nan a yega di premira cu nos lo ta cerando aña cu un recuperacion di turismo entre 30% pa 40% despues cu nos frontera a keda cera ora gobierno a dicidi di lock down. Pues e ta un caida entre 70% pa 60% compara cu aña anterior. Tjin Asjoe-Croes a declara cu practicamente nos ta aworaki den un recuperacion di turismo di 32% compara cu aña 2019.

Algo cu hala atencion ta e grado di satisfaccion di nos bishitantenan cu nan ta midi’e cada luna. Ya cu debi na e pandemia ta no ta facil pa tuma e decision pa biaha, pero tampoco pa bo pasa den e proceso cu un biahe ta demanda den e situacion actual. A base di analisis haci cada luna, caminda nan ta revisa mas cu 100 review site incluyendo por ehempel e tan conoci Tripadvisor. Nan por mira cu durante e ultimo lunanan desde e reapertura di Aruba nos ta score un 9 y e cifra maximo ta 10. El a bisa cu e grado di satisfaccion tabata 8.9 prome cu Covid. Kiermen cu e grado di satisfaccion actualmente ta ainda mas halto cu locual nos ta mira prome cu Covid.

Mas tanto e aspectonan cu ATA ta monitor separadamente ta e medidanan di salubridad y higiena y tambe e protocolnan. E halto ehecutivo di turismo a bisa cu nan ta aspectonan cu nos a score hopi bon. Pero tambe nos a score den grado di satisfaccion en general compara cu otronan. Pero tambe den sanitary safety y health precaution, nos a score hopi bon.

ATA ta observa tambe cu e crecemento mas fuerte di bishitante cu ta cay den e categoria di millennials. Nan ta turistanan mas jong y aventurero dispuesto pa biaha den e situacion actual. Un mayoria di nan a bin pa prome biaha Aruba. Esaki no kiermen cu nos producto turistico no ta hayando e bishitantenan di mas edad. Pero nos por mira cu e crecemento ta fuerte den e categoria aki cu ta un tendencia global.

Mientras cu e baby boomers ta keda un segmento hopi fuerte pa Aruba. “Nos ta keda haya hopi di esnan di edad di 50 bay ariba,” el a bisa. Pero ATA por mira den e temporada aki e tendencia mas fuerte di crecemento compara cu aña pasa den e millennials. Tambe nan ta mira e tendencia hopi fuerte aki te cu october, caminda un 61% di nos turistanan a bin bishita nos isla pa prome biaha. Y esey ta un tendencia nobo y global.

 

Na luna di october un 55% di nos bishitante tabatin un edad entre 20 te cu 49 aña. Y un biaha mas bao e categoria di generacion, e millennials tabata esun mas representativo cu un 33.%%. E di dos posicion ta pa e bishitante considera como baby boomers cu un 28.5%