Gobierno a dicidi di bin cu algun cambio y bin cu mas flexibilidad ainda riba e medidanan pa contene cu e Covid lo por sigui plama na Aruba.

Prome Minister, Evelyn Wever-Croes hunto cu minister di Salubridad Publico, Dangui Oduber a duna un panorama positivo y alentador riba e situacion interno di e pandemia cu a conduci pa bin cu mas flexibilidad di e medidanan, prome cu nos ta drenta formalmente den e temporada festivo di Pasco y Fin di Aña.

Panorama

Ayera nos tabatin 85 caso activo di Covid locual e prome mandatario a consider’e como un bon señal, ya cu nos ta mantene e tendencia di menos cu 100 caso activo ya pa mas cu 10 dia caba. Mientras cu apenas dos luna pasa Aruba a conoce un peak di 1640 caso activo.

E hecho cu awor nos tin menos cu 100 caso activo, e ta haya cu esaki ta un indicacion cu nos ta bayendo den bon direccion. Segun minister Oduber nos tin e situacion bao control, y esaki ta importante pa nos recuperacion economico y di nos turismo. Esaki ta wordo refleha cu Hulanda su code of conseho di riesgo cu nan ta duna pa por biaha a cambia di codigo oraño pa geel.

E cambio aki ta un indicacion cu den e dianan venidero nos lo bay ricibi un gran cantidad di turista Hulandes. Tambe e ta haya un señal hopi positivo na momento cu tambe tin un ‘apetito’ di e biahero Mericano pa bin nos isla. El a anuncia cu e plataforma di migracion di Aruba ta wordo lansa den diferente idioma e siman aki, mirando e apertura di nos frontera cu ta tumando luga gradualmente.

Flexibilisacion

Prome Minister a anuncia e siguiente fase di flexibilisacion cu ta drenta na vigor entrante awe. Den seno di famia ta permiti cu nan por reuni cu cantidad mas grandi cu 6 di hende. E cantidad ta depende di e decision di cada famia pa evita aglomeracion di hendenan den nan cas. E flexibilidad aki no ta kita cu mester sigui aplica e reglanan di tapa boca y distanciamento fisico y mantene tur regla di higiena.

Cu e flexibilidad aki nan ta busca lanta e presion y asina genera mas actividad economico y tambe pa e famia por ta mas uni den e temporada di fiesta venidero.

Tambe establecimento comercial manera restaurant ta wordo permiti mas cu 4 persona den un mesa paden. E ta cambia pa 14 persona sinta riba su stoel den un mesa paden di un establecimento. Y pa esun pafo e cantidad por yega na 20 persona na un mesa. No ta permiti sinta na bar, y tampoco bailamento si tin musica. Orario di ciere ta keda 11’or anochi temporalmente.

Un sector cu a sufri hopi den e pandemia aki ta esun di e sector di entretenimento. Te aworaki nan tabata permiti un maximo di 3 musico, pero nan a dicidi di cambi’e te na 5 musico ariba un escenario paden di un sitio. Y si ta pafo di un sitio, nan ta permiti e agrupacion ya sea gaita of conhunto musical completo.

Pero el a adverti cu e agrupacionnan ta consciente di nan compromiso y kico nan lo mester tene na dje. Ya cu e decision aki a wordo tuma den e dialogo conforme cu e protocol cu a wordo cera cu e grupo di entretenimento. No solamente nan mester mantene distanciamento entre nan mes. Sino cu nan ta principalmente responsabel pa evita cu e hendenan lanta para pa baila. Si ta sosode algo asina nan tin cu para e musica. Pero si nan por deleita nos cu nan musica specialmente pa e temporada di fiesta venidero.

“Intencion no ta cu nos ta bay fomenta aglomeracion di hendenan, pasobra eynan ta caminda e problema por cuminsa,” el a bisa.

Sinembargo el a adverti cu Aruba no a sali for di area di peliger ainda. Por ehempel diasabra a wordo constata 25 caso activo nobo cu – segun Sra. Sharline Koolman di DVG – ta mas relaciona cu un cluster chikito cu a wordo limita t’eynan. Pero e averahe ultimo siman ta di 10 caso nobo pa dia.

A pesar di e bon señal aki riba e cantidad di caso positivo, e preocupacion ainda ta latente. Den hospital tin 8 pashent interna den cual tres ta den cuido intensivo (ICU); y 45 persona a yega di fayece di Covid.

Preocupacion

Ta asina cu mirando e situacion interno di Covid, gobierno ta mira cu tin espacio pa bin cu mas flexibilidad riba e medidanan pa contene e virus. Ya caba dia 1 di december Aruba lo habri su frontera pa Latino America, mientras cu nos ta ricibiendo bishita di Nort America, Centro America, Caribe y Hulanda (Europa). Encuanto e consecuencia cu tur e medida di flexibilidad, y tambe di apertura di nos frontera por trece back pa nos pais, manera a yega di sosode den otro paisnan na Europa, Sra. Koolman di DVG a bisa cu nan ta consciente di locual ta pasando rond mundo.

“Nos tin nos preocupacion pa cu esaki,” asina contestando un pregunta di Bon Dia Aruba, el a bisa.

Esaki ta e motibo cu nan ta mantene e medidanan cu nan ta sinti cu nan ta yuda manera uzo di tapa boca y distancia social. Pero nan no por keda limita tur cos, ya cu na cierto momento nos mester continua cu nos desaroyo economico back.

E ta haya cu esaki ta e manera cu nos mester cuminsa back y nan ta conta riba e responsabilidad civico di cada hende na Aruba. Si nos por sigui mantene e situacion manera e ta bayendo aworaki, e ta sigura cu e pais por deal cune. Pero si nan ta wak como DVG cu e situacion ta bay for di man, lamentablemente nan mester bin cu medidanan back.