Gregory Milliard ta un persona conoci den comunidad pa via di su dedicacion pa deporte, na e momentonan aki e ta na Brasil na unda e ta preparando pa su proxima pelea di Bellator.

Asina Milliard a confirma na Bon Dia Aruba na unda cu tambe el a bisa cu e tin cinco siman preparando na Brasil cu e Team Nogueira cu ta un di scolnan mas grandi na mundo di mix marcial art caminda e ta training pa su di dos pelea cu e lo tin di Bellator, esaki ta e di dos mayor evento di mix marcial art na mundo, e prome ta UFC.

Miyones di hende ta siguido di evento aki unda cu e lo ta competiendo e dia 16 di october proximo den e Bellator 268 na Arizona y lo bringa cu e Mexicano Javier Torres ken ta un veterano cu 17 pelea gana y manera Milliard a sigura “e ta bay ta un pelea basta intenso”.

Milliard ta e prome atleta di Aruba cu ta competi den un competencia asina grandi na unda cu ni un di atleta den e region di Caribe a yega asina leu, e ta e prome cu ta representa Aruba y Caribe.

E ultimo biaha cu Milliard a competi tabata promove e categoria aki di Bellator na Corsou tambe pa asina ey e pais bisiña por sa cu nan tin un atleta local cu ta den mundo di mix marcial art y cu ta na exterior, pa via di esaki Milliard a menciona cu tin hopi interes pa mira esaki door cu UFC tambe a bira asina hopi popular.

“16 di october mi no ta bay representa Aruba so sino tambe Boneiro y Corsou na unda cu mi lo demostra cu den Caribe tambe tin persona cu ta competi cu paisnan grandi”, el a afirma.

Di loke ta trata su parti emocional, el a indica cu e ta sinti su mes hopi bon compara cu e prome biaha na unda na luna di april di e aña aki el a perde contra Julius Anglickas di Lithuania den e competencia di Bellator 257, di esaki el a informa cu el a prepara na Aruba “esaki tabata algo dificil door di pandemia Covid-19 cu financieramente a dal duro na hopi hende y nos no tabatin e budget pa mi por a training na exterior”, el a bisa.

Milliard tabatin dos aña aproximadamente sin actividad manera el a trece dilanti, ora el a bringa cu Anglickas na april el a perde pa via di puntonan y awor na october e mesun bringado aki ta esun cu lo bringa pa e titulo mundial

Aworaki, e ta contento den e parti cu tabatin un par sponsor cu a yudel’e pa cubri su gastonan na Brasil caminda e ta preparando sumamente fuerte “y nos ta bin pa e victoria e dia 16 di october”, Milliard a sigura.

Di e forma aki e ta purba di pone Aruba den e ranking y awor e ta preparando pa bringa den un competencia fuerte na unda cu el a sigura cu “nos ta bin for di un liga chikito pero mi tin e capacidad pa competi contra e grandinan”.

Manera ta conoci den comunidad, Milliard ta un persona cu tin su mesun academia na unda e ta prepara muchanan, hobennan y adultonan den diferente tipo di marcial art.

Loke e kier demostra ta cu “Gregory Milliard ta e miho bringado cu tin den Caribe, mi kier laga e legacy y mustra cu aunke e dia mañan mi no ta competiendo mas, ora bo ta pensa riba Milliard bo ta bay corda riba e guy aki cu a yega hopi leu den mundo di deporte, pasobra mi ta un leyenda pa loke ta parti di deporte, e unico atleta cu tabata profesional den baseball y mix marcial art” Milliard a declara.

E ta menciona cu su perseverancia, disciplina y trabou duro semper a pone cu el a sobresali mas dilanti compara cu otro muchanan, “mi no ta give up facil, esey ta algo cu bo kier laga atras si por traha duro y bo ta kere den bo mes bo por yega hopi leu den bida, hopi biaha nos ta pensa nos no por y nos ta limita nos mes pa crea esey pero, oportunidad ta eynan mes”.

Milliard ta un persona cu a cuminsa training baseball for di 7 aña y despues el a stop ora e tabatin 16 aña, despues el a cuminsa cu deportenan di mix marcial art na unda e tin mas di 15 aña di experiencia lo cual e ta considera cu te ainda esey ta bayendo bon como un atleta di halto rendimento.