Grupo di Colombiano na Aruba lo haci actividad pa colecta ayudo pa nan pais

Manera ta conoci mundialmente, desde mas cu un luna atras, Colombia ta bibando dianan dificil cu protesta y manifestacionnan tanto pacifico como violento, cu a laga atras 45 morto segun ONG Temblores, aunke Human Rights Watch ta papia di un cantidad di 63.

E denomina Welga Nacional a cuminsa cu jornada di protestanan contra un proposicion di reforma tributario cu despues presidente Colombiano, Ivan Duque a elimina. Pero varios punto di solicitud a keda den agenda y cu te ainda esey no a wordo soluciona den varios ronda di negociacion.

Den relacion cu esaki, un grupo di Colombiano residencia na Aruba a ofrece un conferencia di prensa pa trece dilanti e mensahe cu nan pais ta den un crisis social y economico pa via di e Welga Nacional, na unda e hobennan cu ta protesta ta pidi un cambio.

Nan a informa cu nan lo realisa un actividad e dia di mañan na beneficio di e hobennan cu ta den e prome linea di e lucha pa nan derechonan na Colombia. E meta ta pa nan manda un ayudo pa esey por wordo utilisa pa prome auxilio, medicina, entre otro, cu pa via di e atakenan cu nan ta ricibi di parti di e forsa policial di Colombia, nan ta expone nan bida y e crisis ta birando pio dia pa dia, segun nan a expresa.

Segun e vocero di e grupo aki di nomber Jenny Ramirez el a splica cu nan tin contacto cu diferente hobennan di Cali -un di e ciudadnan mas afecta- di Popayan, Tulua y otro ciudadnan na unda nan ta indica cu nan mester di ayudo pa cu esey por wordo distribui entre nan.

“E situacion aki ta dificil pa hopi hende, specialmente pa esunnan cu tin famia y cu tin negoshinan pero esaki ta pa e bien colectivo”, Ramirez a indica.

Asina mes, el a expresa cu nan kier tin un Colombia miho y ta p’esey cu e hobennan a bisa “stop, no mas”, e idea di e actividad aki a sali for di un grupo di por lo menos 50 persona cu kier aporta un ‘granito di arena’ na nan pais for di e ayudo cu nan lo kier ricibi e dia di mañan cu e benta di e cuminda.

Ademas, Ramirez a afirma cu e obhetivo ta pa manda e ayudo y compra e articulonan cu e personanan na Colombia tin mester por ehemplo, algun muchanan mester di pamper, cuminda y lechi, segun loke Ramirez a splica nan tambe kier apoya e hobennan y nan famia.

El a trece dilanti cu nan ta apoya e lucha cu e hobennan tin y no e actonan violento, nan tin pensa di haci mas actividadnan di e tipo aki te e dia cu nan por haci’e y manda e ayudo pa Colombia.

P esunnan cu tin interes di colabora cu e actividad aki, mañan diadomingo nan lo bay bende cuminda y pidi colaboracion na e adres Babijn 38M for di 11 di mainta te cu 3or di atardi.