Presidente Ehecutivo di Camara di Comercio di Guajira, sr. Alvaro Romero a realisa un bishita di trabou na Aruba. E meta tras di e bishita aki tabata reactiva y fortalece e relacion comercial bilateral cu entre nos isla y e region Colombiano aki.
Reunion cu Camara di Comercio
El a bisa cu a sostene un reunion cu directiva di Camara di Comercio di Aruba (KvK) pa evalua tur posibilidad; y asina nan por mira con conhuntamente nan por desaroya y haci sostenibel e economia di un region di Colombia cu un pais manera Aruba.
El a añadi cu e trabou aki no ta uno cu a cuminsa awor sino cu nan a yega di bishita Aruba den otro ocasionnan, unda a resulta algun mision comercial di Aruba cu a bay bishita Riohacha.
Actualmente y despues di e reunion cu sr. Romero a sostene cu KvK, nan tin plania di bin cu un mision comercial for di Guajira prome cu fin di aña. El a bisa cu e reunion cu nan a sostene diahuebs ultimo tabata uno fructifero.
Sr. Alvaro Romero a bisa cu bishita tabatin dos obhetivo. Ademas di reactiva nan contacto cu KvK y mustra e interes cu ta existi entre e gremio comercial di Guajira pa mantene un actividad mas dinamico cu Aruba, tambe el a bin compaña e historiado Fredy Gonzalez Zubiria cu a introduci su obra nobo na Biblioteca Nacional Aruba.
Sr. Romero a bisa cu Camara di Comercio di Guajira a sostene e proyecto di e buki aki cu nan ta considera importante, ya cu ta wordo conta e relacion comercial y humano cu semper a existi bilateralmente. E ta spera cu e resultado di e investigacion den e buki “La Guajira-Aruba, Hermanas unidas y separadas por el mar”, lo por bira realidad den un futuro cortico.
“Cu nos por bisa e dos pueblonan ruman aki cu ta existi cierto oportunidadnan cu nos por probecha, y cu nos por acerca ambos region pa reactiva e comercio cu no mucho aña atras, tabata existi. Nos ta papiando di historia pero un historia recien”, el a bisa na Bon Dia Aruba.
Acuerdo
Sr. Romero a elogia e trabou cu fundacion Rancho ta bin haciendo pa reactiva e comercio bilateral. Ya den pasado un mision comercial di Guajira a bin Aruba pa wak e oportunidad cu ta existi pa e gremio empresarial di ambos parti. Te hasta nan tabata casi cla pa firma un MoU. Pero a surgi algun situacion y e acuerdo finalmente no a wordo concretisa. Actualmente Guajira di su banda ta dispuesto pa esaki finalmente lo por bira un realidad.
Como Camara di Comercio di Guajira, sr. Alvaro Romero a indica cu nan lo por papia tanto cu Gobernador actual di Guajira y Alcalde di Riohacha pa mira conhuntamente con “nos por reactiva tur avance cu nos a yega di ofrece di ambos banda y con nos por desaroya nan”, el a declara.
“Pero tur e pasonan aki cu nos a yega di cana y cu nos a avansa leu y cu nos ta kere cu ainda nos por fortalece nan”, el a bisa.
Sr. Romero a laga sa cu durante su bishitanan na Aruba e ta percibi cu ta existi un interes mutuo. P’esey el a reuni cu KvK, ya cu como presidente di Camara di Comercio di Guajira, e ta considera importante pa nan ta riba e mesun liña, ya cu como sector priva nan ta esunnan cu ta duna sostenibilidad riba e parti economico y comercial.
Unabes cu nan por bin di acuerdo entre nan mes, nan por bay riba e sector publico pa laga nan sa cual ta e intencionnan cu nan tin pa asina nan por haya e apoyo necesario pa desaroya e relacion bilateral aki. Y esaki tabata e prome paso cu el a haci, bishita KvK durante su bishita na Aruba cu a culmina ayera.
Sr. Romero a laga sa cu tempo cu sr. Otmar Tromp tabata presidente di KvK nan a avansa hopi riba e tereno aki, pero awor el a papia riba e mesun topico pa asina sigui cu e proceso aki pa e por bira realidad conhuntamente.
“Asina nos por invita e gobiernonan local pa sinta hunto cu nan y bisa nan cu ya nos ta avansa riba esaki. Asina ambos gobierno local mester bin di acuerdo entre nan mes pa nos por tin interaccion”, el a bisa
