(ElTiempo) – Presidente di Guatemala, Alejandro Giammattei diabierna ultimo a propone na Colombia pa trata den e Cumbre di Celac cu ta cuminsa awe na Argentina e diferencianan surgi debi na e intencion di Ministerio Publico di e pais centro Americano di investiga e minister di Defensa Colombiano, Ivan Velasquez.
“E diferencianan entre paisnan mester wordo resolvi via diplomatico, no bale la pena evita algun grado di incomodidad cu insultonan of otro cos. Nos a propone Gobierno di Colombia cu por papia cu canciyernan probechando cu nan ta bay ta na Celac,” Giammattei a bisa.
E cumbre number 7 di hefenan di Estado y di Gobierno di Comunidad di Estadonan Latino Americano y Caribeño (Celac), cu Giammattei ta propone como escenario pa resolve e diferencianan cu Colombia ta cuminsa awe na e capital Argentina, Buenos Aires.
Ademas, el a bisa cu husticia di Guatemala ta bay respeta e inmunidad diplomatico di e minister Colombiano, ken entre 2013 y 2017 tabata fungi como hefe di Comision Internacional Contra Impunidad (Cicig) na e pais centro Americano, actuacion cu ta wordo cuestiona pa un fiscal Guatemalteco.
“Guatemala a respeta tur convenio y tratado, igual si el a comete un delito, e señor Velasquez no lo wordo procesa, pero tin cu investig’e. Si e ta wordo involucra no por wordo husga, pero investiga si,” el a señala.
E declaracionnan di Giammattei ta busca alivia e tension cu Bogota, cu a yama na consulta su embahador siman pasa despues cu un fiscal Guatemalteco a ordena “accionnan legal” contra e minister Velasquez, ken ta gosa di inmunidad diplomatico pa dirigi entre 2013 y 2019 e Comision Internacional Contra Impunidad na Guatemala (Cicig) un organo di ONU na unda a wordo revela varios scandal di corupcion.
