Home Local GZ-psycholoog Meliza Lopez: ‘Acceso na cuido di salud mental mester ta pa...

GZ-psycholoog Meliza Lopez: ‘Acceso na cuido di salud mental mester ta pa tur hende’

1601

Recientemente, Meliza Lopez kende ta specialisa den kinder- en jeugd psychologie a habri su mesun praktijk bou nomber di PSYMIA. Den e entrevista aki e ta conta Bon Dia Aruba tocante e retonan cu e ta encontra den su ramo y con hende ta adkiri acceso na cuido pa nan salud mental.

Lopez, kende a keda nabega su ramo entre Aruba y Hulanda pa un totalidad di 10 aña tratando di adkiri tur su cualificacionnan, ta conta cu un experiencia hopi amplio riba tereno di trastorno nan psychiatrico serca mucha y hoben. “E ta importante pa comprende cu mi trabao no ta un trabao cu ta preventivo. Ami no por evita cu algo ta pasa cu un mucha pero mi ta akinan pa yuda resolve locual ta pasando of locual a pasa caba pa asina e no tin un efecto drastico cu ta stroba e mucha su desaroyo”, Lopez ta subraya.

Acceso y motibonan pa ayudo
“Hopi ta esunnan cu mester cuido mental na Aruba pero no tin e recursonan pa paga esaki.”

Cual ta di lamenta, pasobra acceso na cuido mental ta algo cu mester ta accesibel pa tur hende. Ayudo psicologico ta wordo parcialmente cubri, pero solamente pa ambtenaar nan cu tin AZV-plus. “Mi ta ripara esaki tambe den e clientela cu ta acudi serca mi pa ayudo”. Aunke cu nos poblacion ta di opinion cu cuido mental ta sumamente importante, ta e sosten financiero ta haci cu e ayudo psicologico profesional ta bira mas accesibel.”

E ta sigui splica cu ‘tin biaha cierto comportacion ta preocupa mayornan, of esnan cu ta cuida e mucha manera welonan pero tambe maestronan di scol cu ta guia e mucha tur dia den klas’. “E mucha por ehempel ta agresivo, hopi miedoso, ta desconcentra di mas, ta mucho impulsivo of ta hopi insigur y door di esaki ta stagna den su desaroyo. Pa tur e motibo nan menciona mayornan por acudi na un psycholoog cu ta experto riba desaroyo di mucha. Tambe por tin preocupacion paso ta trata di menornan di edad cu a wordo abusa fisicamente, sexualmente of emocionalmente. Mayoria biaha e casonan di abuso ta yega na e specialistanan di hospital cu ta traha cu un otro instancia pa e parti di tratamento di trauma psicologico. E ta importante pa sa cu nan por acudi cerca mi tambe pa ayudo inmediato. E profesional nan riba e tereno di tratamento di trauma cerca mucha, mester parti e trabou aki, paso pa e propio bienestar como hulpverlener e no ta bon pa trata casonan di trauma so henter dia.”

Variacion den clientela
Lopez a dicidi di cuminsa su propio praktijk despues di realisa cu trahando pa un otro persona/compania, e no tabata hayando e recompensa cu su experticio ta merece.

Esaki a habri porta pa realisa su deseo di hopi aña pa habri su mesun praktijk. Lopez ta cualifica pa haci investigacionnan tocante comportacionnan di mucha y duna diagnostico di esaki.

Ayudo psicologico ta consisti di haci diagnostico y duna tratamento pero cada psycholoog tin nan propio experticio. “Mi experticio ta psicologia cu mucha y hoben, pero mi ta cualifica pa atende hende di tur edad.” Esaki kiermen cu Lopez ta ofrece diagnostico y tratamento pa mucha y hoben di 4 pa 18 aña y pa adulto solamente tratamento. “Aworaki mi ta nota cu mi ta bin mas den contacto cu adultonan cu kier ayudo mesora y cu tin e recurso financiero pa paga esaki.”

Buscando ayudo
Lopez ta conta cu ora un hende cuminsa desde cero, manera den su caso e ta dificil pa yega na e clientenan cu ta su doelgroep.

Sinembargo, e ta mira e interes cu tin den comunidad pa locual ta trata cuido di salud mental. Hende kier ayudo y nan ta busca esaki tambe. “Aworaki mi a informa tur e dokternan di cas y e specialistanan di mucha y mas despues mi lo tuma contacto cu scolnan tambe pa hende sa cu mi tey”, e ta bisa.