Habitantenan di area Parkietenbos ta wardando pa solucion

Redaccion di Bon Dia Aruba a ricibi un tip, unda a splica cu den mondi cerca di dump na Parkietenbos lo a haya varios pisca morto ta flota den rooi. Despues di a bay investiga na e sitio no por a haya pisca morto. Locual si por a nota cu e area di mondi pega na e dump tabata hole straño y a haya otro especie di bestia morto.

Varios biaha den pasado por a nota cu gruponan di ciudadano bibando den area di Parkietenbos/ Simeon Antonio a vocifera nan preocupacion pa cu e situacion na dump. Ta trata cu aspectonan di salud di e habitantenan pero tambe cu preocupacion pa e medio ambiente den e area. Despues di a bay investiga e area di mondi cerca di dump a purba haya reaccion di personanan cu ta biba den area pa un reaccion di locual ta pasando na den nan cercania.

Un persona cu no kier a duna su nomber a comenta cu biba den e area di Parkietenbos, ta biba den un ambiente completamente contamina. “No ta solamente e dump cu ta contribui na esaki, pero tambe e fabrica di cement cu ta opera no mucho leu di dump. Antes tambe tabatin un planta cu tabata procesa sushi kimico. E tempo ey mi tabata lanta y saca casi tur dia pasobra e holo tabata insoportabel.”

E cabayero tambe a expresa cu e doño di su cas ta pensa di bende esaki, pero no tin modo cu un persona local lo bay cumpra su cas mirando e situacion. “Si e lo kier bende mester busca un hende di afo cu no sa di e situacion den area aki.”

Habitante di Bucutiweg ta comenta

Un habitante di Bucutiweg cu a pidi nos pa no duna su nomber a splica cu: “Mi tin 8 aña bibando akinan cerca di dump. Prome cu esaki mi a tende di e situacion na Parkietenbos pero nunca mi lo a imagina con grave e situacion ta. Mi no tin asina hopi tempo bibando akinan manera mi bisiñanan, pero asina mes mi ta hopi preocupa.”

Segun e habitante di Bucutiweg, e ta sorprendi di e manera cu ta neglisha e situacion na e dump. “Mi ta wak riba television y tende riba radio constantemente cu ta bay bin cu un solucion. Pero nunca ta bin cu plannan concreto pa drecha e problemanan aki.”

No ta separa sushi pa tipo

E habitante di Bucutiweg ta splica cu tin varios problema relaciona cu e dump. Pa prome ta e echo cu tur tipo di sushi ta wordo tira den e dump. “Sushi di hospital, barconan di crucero, di pueblo..” Sinembargo segun e, antes Ecotech tabata separa diferente tipo di sushi, pero e no sa dicon a stop cu esaki. “E tempo ey nan a stop di hiba nan sushi pa dump y a cuminsa separa e sushi cu por wordo uza. Di e manera aki bo ta evita pa kimiconan y otro cosnan no desea mescla cu cosnan cu por wordo utilisa.”

Mangelnan den area ta core riesgo

E mangelnan den area di Parkietenbos no ta haya suficiente atencion, segun e habitante di Bucutiweg. “For di e barancanan bo no ta wak mucho cambio den e mangelnan. Pero frecuentemente mi por wak di e banda di lama con durante transcurso di tempo e mangelnan ta bay mas atras.”

E potretnan di banda di lama di e mangelnan a wordo tuma pa e habitante di Bucutiweg.

Esaki mi ta haya lamentabel mientras ta celebra ora ta purba planta mangel den Paardenbaai, Pos Chikito y na Zeewijk por ehempel. No ta tene cuenta cu e mangelnan di Parkietenbos tambe mester wordo proteha.”

Kimamento di sushi

Un problema cu ta crea hopi malestar den e area ta ora ta kima e sushi di dump. Segun e habitante di Bucutiweg, e no ta crea problema tur ora, ta ora e biento cambia di direccion nos ta haya nos mes cu huma den nos pulmonnan. “Ta casi manera nan ta haci’e pa malo, pasobra cada biaha cu biento bira mi ta nota cu nan ta cuminsa kima e sushi.”

Yena buraco cu sushi

E habitante di Bucutiweg ta splica cu lo por haci algo positivo toch cu e sushi cu ta keda acumula den un tipo di ‘sero’. “Bo lo por yena e diferente buraconan cu a wordo crea pa haya material di construccion manera esun na Santa Marta. Esaki por percura cu e sushi wordo uza pa algo positivo toch. Cu e tereno nobo ey por traha por ehempel un centro pa deporte. Mi ta haya cu e maneho no ta percura pa solucion creativo of duradero.”

Posibel solucion pa futuro

E manera cu e sushi ta wordo maneha no ta eficiente, segun e habitante di Bucutiweg. E ta recomenda cu na Aruba mester bin cu un “Incinerator system” pero e ta nota cu e no ta pensa cu tin suficiente conocemento actualmente. Of tampoco si ta cla pa esaki riba e isla, manera na paisnan manera Hulanda of Merca. “Pero e sistemanan aki ta asina avansa awendia cu por te hasta genera energia cu kimamento di sushi.”

Tambe e ta pidi pa bin cu un programa na scol unda cu e proximo generacionnan por bira mas consciente pa anda cu sushi. “Mi ta haya cu mester cuminsa educa nos proximo generacionnan pa cambia nan habito pa miho. Mester custumbra cu separa sushi, esaki mi ta haya esencial. Di e manera aki nos por uza nos sushi pa genera solucion y no problemanan.”

Den e proximo dianan e matutino aki lo purba haya comentario di banda di un mandatario of persona cu ta traha den e dump mes.

You May Also Like

rector UA programa specialisacion (1).jpg

Universidad di Aruba lo sigui ofrece mas programa di specialisacion

Rector di Universidad di Aruba, Dr. Glenn Thode a destaca e importancia di e ...

9 lista cu candidatonan pa eleccion 2017 entrega

Ayera 10 partido politico a postula nan candidatonan p’e eleccion 2017. 9 lista a ...

8juni,SL, prikichinan .jpg

Departamento Naturalesa y Medio Ambiente: Nos prikichinan ta scars, ban proteha nos bestianan local

Tur aña ariba 5 juni mundialmente ta celebra World Environment Day, Dia Internacional di ...

1jul, NW, edmundo marling (3).JPG

Edmundo Marlin: Trahadonan no ta di acuerdo cu procedura di gobierno pe reorganisacion di IBiSA

Ayera mainta durante e welga cu algun trahado di IBiSA tabata tin, e sindicatonan ...