Departamento di Estado Mericano a informa cu nan tin entendi cu tin un cierto cantidad di ciudadano di nan pais entre un grupo aresta na Haiti.
Medionan local a raporta di arma semi-automatico cu lo a haya den e operacion, pero no a confirma esaki oficialmente.
E circunstancianan a keda incierto, pero autoridadnan local a conta CNN cu e Mericanonan ta deteni bao acusacion di conspiracion, pero cu no tin acusacion hudicial formal ainda.
E arestonan a tuma lugar despues di dos siman di protesta contra presidente Jovenel Moïse.
E motibo pa cual e grupo tabata na e pais tambe a keda incierto, y no a confirma identidad di e personanan tampoco. Polis di Haiti no a responde riba yamada di parti di BBC.
Pero Inspector Gary Desroisiers, un vocero interino di polis nacional, a conta agencia di noticia Haiti Libre cu e grupo a ‘nenga di papia’.
E grupo, cu lo consisti di ocho miembro, a keda deteni na capital Haitiano Port-au-Prince diadomingo pasa. Medionan local a raporta tambe cu lo tabatin un ciudadano di Serbia y un Ruso den e grupo.
Desde dia 7 di februari, miles di persona ta protestando na Haiti contra inflacion creciente y tocante acusacion di corupcion grandi den fondo di desaroyo liga na un acuerdo di petroleo cu Venezuela.
