Kevin Peterson a laga Cuerpo Policial di Aruba pa dirigi Bureau City Inspector y nunca mas a mira atras. Pero, e personalidad trankilo no a laga e polis den dje bay nunca. Y e trabou pa dirigi un organisacion cu tin e peso di comunidad riba schouder pa yuda mantene medio ambiente limpi y saludabel no ta facil, sigur no sin e hermentnan necesario.

Mi a traha 31 aña na Cuerpo Policial di Aruba y dia 24 di September mi a haci tres aña na Bureau City Inspector. Peterson tabata buscando un cambio y e funccion di hefena BCI tabata habri, despues cu Marlon Pietersz a bay cu pensioen. El a pasa un screening largo di siete luna, pero el a haya e encargo. E cambio no tabata hopi grandi pasobra aki tambe nos ta traha cu ley. Y ami semper a conseha Minister, cu na BCI mester tin of un hurista of un polis. Kizas un hurista lo no ta interesa den e trabou aki, pero un polis si. Y e polis lo mester tin su experiencia pa ta na cabez di e servicio aki. Motibo ta cu ta e hefe ta esun cu mester conseha e personal cu ta consisti di City Inspector kico por y kico no por. Si ta algo pa polis, nos ta envolvi polis e ora.Kevin Peterson a bisa cu semper e tabata interesa den medio ambiente y como tal, el a sali net bon.

E trabou di Bureau City Inspector ta interesante ya cu esey ta e instancia cu mayoria hende ta yama ora di mira algo cu ta bay contra interes di naturalesa y medio ambiente. Y cu introduccion di e ROPv, esta e Ordenanza Teritorial cu regla, lo a kere cu BCI lo a haya mas responsabilidad. “Mi a pasa den henter e ROPv y ningun caminda mi a mira kico ta responsabilidad di BCI,” Peterson a bisa Bon Dia Aruba. “Esey no kiermen cu nos no mester yuda. Nos ta riba caya tur ora y si mira cu ta rosa tereno, nos ta puntra si tin e aanlegvergunning, sea ta tereno priva of no.

Problema ambiental mas grandina Aruba

Aunke cu rosamento di tereno mas di 750 meter cuadra sin un aanlegvergunning por duna boet, esey no ta e problema mas grandi na nivel ambiental. “Sushamento di Aruba ta e problema mas grandi,” Kevin Peterson bisa. “Aunke tur cos ta causa daño. Si rosa sin mas ta causa daño na naturalesa. Y poco poco Aruba ta birando druk. Si sigui asina nos ta keda sin mata, sin nos cadushi y esey ta hopi serio. E problema di sushamento ta keda semper cu ningun hende ta duna dato concreto pa por actua.” Hopi biaha e city inspectornan ta acudi pa mira luganan cu ta sushi, pero ora ta yega na puntra bisiñanan si nan por a mira algo, nunca ta haya contesta. “Nunca a wak ken of nunca a registra number di e vehiculo, of ta bisa cu a bin tira e sushi den ora di marduga. Ta imposibel pa asina por confronta esnan cu ta haci sushi.”

P’esey mes e trabou di mantene Aruba limpi ta tarea di tur hende. “Por yama Centraal di polis na number 100 si ta despues di 4’or di atardi. Y yama nos durante dia na BCI. Pero semper purba tuma number di e truck of auto y indica unda a mira cu a tira, pa asina hunto tur instancia por traha.

ROPv

E ROPv mientrastanto ta na vigor entrante September 1 y e ta nifica cu tin hopi regla cu ta conta pa tereno publico y tereno priva, cu ta nifica cu ningun hende por haci y deshaci, ni cu su mesun tereno. Pero e control ta keda un reto pasobra DIP ta encarga cu su ehecucion y DIP lo mester di haci uso di polis. Y ta pa e motiboey, a pidi pa BCI, KPA y DOW hunto cu comunidad traha hunto pa yega na un pais manera ta describe den e ROPv, un pais ordena cu ta brinda calidad di bida. “ROPv no ta dificil pa compronde y tur hende por les’e, riba e website di DIP. Eynan por bias kico e ley ta bisa.

Manera Peterson a bisa, e semper tabata interesa den medio ambiente y ta pesey mes, tin biaha e trabou ta afect’e. Specialmente ora cu ta caba di organisa un trabou di limpiesa pa despues mira con hende ta bolbe bin susha. Ehempel ta e caminda di santo na altura di e veld di bula avion remote control, esta Bottomhillweg. “Cada biaha mester haci limpi. Tabatin algun material cu Serlimar no por a bay cu n’e y mi a haya DOW pa bin cu ekipo pisa y a haci henter e caminda limpi. Esey tabata tres siman pasa. E ta increiblemente doloroso pa bolbe pasa awe y bolbe mira e cantidad di sushedad acumula atrobe.

E problema pa BCI y e City Inspectornan ta cu mester topa cu e malhechornan ta tira sushi. Of mester cambia ley, pone camera scondi pa capta tur e movecion. “Tur cos ta costa placa. Mi ta contento cu turismo ta lentando bek, pa asina por haya e fondonan pa nos por gara hendenan cu ta keda daña medio ambiente.

Peterson a splica cu a ripara si un patronchi den tiramento di sushi. Ehempel clave ta riba e caminda di santo for di Longfellow Bar pa caminda di Barcadera. Por haci e caminda ey limpi tur ora, pero por conta cu y ariba e dialuna of diamars siguiente, mester bolbe haci limpi. “Hopi hende ta haci nan cura limpi den fin di siman, riba Diadomingo. Pero dump ta sera. Pues kico bo ta haya? Cu enbez di warda pa hiba e sushi ora cu dump habri, ta prefera di tira e sushi riba e ruta pa Parkietenbos. “Serlimar a haya e custumber di pasa piki e sushi tur Dialuna of Diamars. Kiermen ta hendenan cu a bay dump.”

Pa awor, mester busca forma creativo pa maneha e situacion di sushi na Aruba, pasobra cualkier medida efectivo ta bay costa placa. Algo cu no tin.

Consientisacion

Di otro banda, pa baha e sushedad riba e isla, Bureau City Inspector kier e sosten di comunidad pa tene Aruba limpi, y a cambio kier consientisa comunidad tambe riba e importancia di un medio ambiente proteha y limpi. Ta haci mas uso posibel di e Facebook. Y e mensahe ta cla: “No daña nos medio ambiente. Y riba dje, nos ta biba di turismo. Turistanan cu ta mira un pais hopi sushi lo no kier bolbe. Sushedad no ta hygienico y ta bay contra salud publico. Nos no kier pa turistanan haya e impression ey di Aruba. Ban tene Aruba limpi. Pero nos mester haci’e hunto, pasobra BCI so no por.”

LEAVE A REPLY

Please enter your comment!
Please enter your name here